Kampo ni Liza binantaan ng demanda ang nagkalat na buntis siya! (Sabong News)
Author
ISYU AT BANAT
Date
JULY 06 2019
Pang-ilang operasyon na nga ba ang nagawa sa finger ni Liza Soberano? Pangatlo na ba? Kasi ang problema nga ay nagkaroon siya ng infection kaya kailangang ulitin ang surgery. Hindi mo masasabing basta-basta ang gastos niyan dahil sa US na siya nagpapagamot. Iyon din ang dahilan kung bakit matagal na natin siyang hindi nakikita, kasi kalokohan namang umuwi siya sa Pilipinas nang hindi pa siguradong maayos ang pagpapagamot niya.
Alam naman ni Liza na nagtatagal na nga siya roon, pero ano ang magagawa niya? Mas mahalaga siyempre iyong kanyang kalusugan.
Dahil naman diyan kaya may gumawa ng tsismis na diumano, buntis lang si Liza Soberano kaya nagtatago sa US. Madali talagang gumawa ng tsismis, ang problema kaya ba nilang patunayan ganoong lumalabas ang mga lehitimong istorya na may litrato pa at video kung minsan kung ano talaga ang ginagawa ni Liza sa ospital sa US. Natural magbunganga naman ang manager niyang si Ogie Diaz.
Mabilis naman ang reaksiyon, nag-apologize iyong radio personality pero ang nakakatawa eh, kasi sinabi niya sa kanyang apology na “alam kong ang ginawa ko ay mali. Kaya humihingi ako ng tawad sa mga nasaktan”.
Diyan makikita ninyo ang kawalan ng experience. Siguro dahil sa galit ni Ogie at sinabing nai-save niya ang blog at kinukunsulta na niya ang isang abogado, nagmadali naman siyang bawiin iyon para hindi na komunsulta sa isang abugado.
Mabilis na naalis ang blog. Inilabas nga ang public apology. Pero tandaan ninyo, sa batas ang pinag-uusapan ay ang malisya at oras na aminin mong alam mong mali ang ginawa mo, naroroon na ang malisya. Kaya kung hindi pakinggan ni Ogie at ni Liza ang kanyang apology at idemanda pa rin siya, iyon mismong kanyang apology ang magbibigti sa kanya.
Naghugas na rin ng kamay ang istasyon ng radyo, at sinabing kung ano man ang inilalabas na posts ng mga tauhan nila sa kanilang website ay wala silang kinalaman. Naloko na!
Totoo nga raw na si Lea Salonga ang siyang napiling endorser ng isang sabong panlaba, pero kaya siya ang pinag-endorse at kaya naman niya tinanggap ay dahil naiiba iyon. Kumbaga, binago iyon at mas ginawang mahusay kaysa sa dati. Hindi iyan iyong dati lang na panlaba nila.
Kung iisipin mo rin naman kasi, si Lea Salonga ba naman mag-eendorse ng basta lang sabong panlaba, eh simula pagkabata niyan kilala na namin, hindi nakapaglaba iyan eh. Kaya lang siguro nga na ngayon at may pamilya na siya, siya na ang namimili ng sabong panlaba.
Kami man ang advertiser kung may bago kaming produkto, kukunin namin kung sino man ang inaakala naming mas magiging epektibong endorser ng aming produkto. Eh ano nga ba ang issue kung ang kinuha nila ay si Lea?
“Wala naman siyang interest talaga sa girls eh,” ang sabi ng isang female star tungkol sa dati niyang ka-loveteam. Napagkuwentuhan daw kasi nila ang dating ka-loveteam noon nang minsang makasama niya ang mga dati niyang kaklase. Marami sa dati niyang classmates ang nagsasabing “sayang” dahil mas pogi ngayon ang dati niyang loveteam. Mabilis naman daw sumagot ang female star, “dito na lang ako sa hindi masyadong pogi pero sigurado naman akong lalaki”.
Iyon na!