ALAMIN: Mga paraan upang maprotektahan ang bawat tahanan vs COVID-19 (Sabong News)
Author
Robie de Guzman
Date
APRIL 01 2020
2117
Sa ilalim ng ipinatutupad na enhanced community quarantine, limitado ang kilos ng mga tao at pinapayuhan ang lahat na manatili lamang sa bahay upang mapigilan ang lalo pang pagkalat ng novel coronavirus disease (COVID-19).
Ngunit may mga pagkakataong kailangan mong lumabas ng bahay upang magtrabaho o kaya ay bumili ng mga pangunahing pangangailangan ng iyong pamilya.
Paano mo masisigurong sa iyong pagbalik ay hindi mo maipapasok sa inyong tahanan ang mapanganib na coronavirus?
Ipinapayo ng Department of Health (DOH) ang pagdadala ng alcohol o hand sanitizer kapag lalabas ng bahay. Gamitin ito na panlinis ng kamay kung walang magagamit na malinis na tubig at sabon sa paghuhugas ng kamay.
Kung namimili o bumibiyahe, dapat iwasan ang paghawak sa iyong mata, ilong at iba pang bahagi ng mukha lalo na kung may ibang bagay ka nang nahawakan. Ito ay upang huwag pumasok sa iyong katawan ang virus na maaaring nasa iyong kamay.
Pagkauwi, agad hubarin ang suot na sapatos at mag-spray ng alcohol sa swelas nito bago pumasok ng bahay. Mas maiging ilagay ang sapatos sa itinalagang lugar sa labas ng bahay o malapit sa pintuan.
Pagpasok sa loob ng bahay, hubarin ang iyong damit at ilagay sa hiwalay na laundry bag. Agad itong labhan gamit ang tubig, sabong panlaba at kaunting bleach.
Kung ikaw ay medical worker at galing ka sa trabaho sa ospital, mainam na mag-disinfect ka muna bago pumasok sa loob ng inyong bahay. Ito ay upang maprotektahan ang iyong pamilya mula sa mga mikrobyo.
Kung gumamit ng personal protective equipment (PPE) tulad ng gloves at face mask, sinabi ng DOH na dapat itong ilagay sa isang selyadong bag bago itapon sa hiwalay na basurahan. Tiyaking nakasara ang pinaglagyan ng PPEs sa loob ng 72 oras bago iwanan sa labas ng bahay upang makulekta.
Ilagay ang bag, susi, barya at iba pang gamit na dinala sa labas sa itinalagang lugar o kahon malapit sa pintuan.
Ayon sa DOH, dapat linisin ang mga ito pati na ang ginamit mong bag sa pamamagitan ng pag-spray ng bleach na may halong tubig o 70% alcohol solution.
Upang masigurong wala kang maipapasok na mikrobyo sa inyong tahanan, ipinapayo ng DOH ang paglalagay ng alcohol o sanitizer malapit sa pintuan ng bahay at linisin muna ang kamay bago pumasok sa bahay.
Kung hindi pa nakakapaglinis ng kamay, huwag munang hawakan ang mga bagay sa loob ng bahay.
Ayon sa DOH, dapat hugasan ng mabuti at sabunin ang lahat ng parte ng katawan na nakalantad sa ere tulad ng kamay. Kuskusin rin ng mabuti ang katawan.
Ugaliing maglinis at mag-disinfect lalo na ng mga bagay na madalas hawakan sa inyong bahay gaya ng doorknob.
Bago simulan ang disinfection, magsuot ng gloves upang maprotektahan ang inyong kamay mula sa mga kemikal.
Sa pagdi-disinfect ng mga kasangkapan, maaaring gumamit ng karaniwang chemical disinfectants sa bahay tulad ng alcohol, at bleach o chlorine solutions. Ihanda ito sa isang well-ventilated na lugar.
Mag-ingat sa paggamit ng disinfectants at iwasang malagyan ang mga mata, bibig at balat. Basahin ring maigi ang instructions sa paggamit nito.
Tiyaking maghugas ng kamay pagkatapos gumamit ng chemical disinfectant.
Payo ng health experts, patuloy na gawin ang mga hakbang na ito upang maiwasang mahawa sa mga sakit lalo na sa COVID-19.
Ugaliin ring maghugas ng kamay, sumunod sa patakaran ng social distancing, takpan ang ilong at bibig kung uubo o babahing.
Kung may sakit, mas maiging magpahinga at huwag umalis ng bahay, Kung kailangang lumabas ay magsuot ng face mask upang mabawasan ang panganib ng pagpasok ng COVID-19 sa inyong tahanan.