Way ebidensya batok ni Cortes (Sabong News)
Author
Camille Pateres
Date
AUGUST 08 2019
CEBU, Philippines – Wala giapil sa gipasakang kaso si Mandaue City Mayor Jonas Cortes ug ang pamilya nga gituohang maoy tag-iya sa cockpit arena nga gironda sa mga sakop sa CIDG-7 niadtong Lunes sa gabii diin 370 ka mga nanari ang nadakpan.
Ang hepe sa Criminal Investigation and Detection Group (CIDG)- Mandaue nga si Police Major Edwin Lacostales nagkanayon nga wala sila’y igong ebidensya nga ang maong mayor ug ang pamilya niini maoy nagpadagan sa maong sabongan.
“Titingnan pa natin, kasi ang alam ko corporation ‘yan ibig sabihin marami. Tingnan natin kung sino talaga ang owner kaya di pa natin ma point, wala pa tayong ebidensya,” sigun ni Lacostales.
Nasayran nga sa report nga migawas sa The Freeman, gikompirmar ni Mandaue City Administrator Jamaal Calipayan nga gipanag-iya nilang Cortes ang maong sabongan apan legal kini. Kagahapon pormal na nga gipasakaan og kaso didto sa piskalya ang dili momenos 370 ka mga nadakpan sulod sa D&C Coliseum didto sa Barangay Ibabao, Dakbayan sa Mandaue.
Sila gipasakaan og pagpanglapas sa P.D. 449 diin gidili ang pagpahigayon og sabong atol sa weekday. Base sa maong balaod, gitugot lang kini matag Domingo, legal holidays, ug pista. Samtang gidili niini ang pagsabong matag holidays, election registration day.
