USAID nanghatag hygiene kits sa mga Bol-anon (Sabong News)
Author
Liezl Mabini Frasno/WC
Date
OCTOBER 27 2013
CEBU, Philippines - Gitunol na sa United States Agency for International Development (USAID) ang 6,000 ka hygiene kits alang sa mga biktima sa linog sa Bohol.
Ang buhatan sa Philippine Information Agency (PIA)7 Bohol nagkanayon nga si Gob. Edgar Chatto maoy midawat sa maong mga hygiene kits. Kini human ihatag nila ni USAID Mission Director Gloria Steel ug USAID Regional Adviser Ben Hemingway, kauban ni Department of Health (DOH) Sec. Enrique Ona didto sa People’s Mansion niadtong Biyernes sa buntag.
Sumala sa report sa PIA nga nadawat sa Banat News nga gisulod sa mga balde ang maong mga hygiene kits.
Ang matag balde adunay tag lima ka toothbrush, usa ka botelya nga shampoo, tulo ka sabon pangligo, tulo ka baretang sabong panlaba, 20 ka sanitary napkin, duha ka sudlay ug usa ka nail cutter.
Sumala sa PIA nga gibutyag ni Steel nga gawas pa niini, mikapin sa P2 milyones nga donasyon sa USAID ang ilang gihatag alang sa relief operation sa Bohol.
Nasayran gikan sa PIA Bohol nga si Gob. Chatto maoy mipadangat sa mga pasalamat sa mga Bol-anon kang Steel ug sa pamilya sa USAID sa ilang padayong pagtabang sa mga Boholano.
Matud pa ni Chatto, gawas sa pagkaon, mahinungdanon usab ang hygiene kit sa mga evacuees aron magpabilin ang kahinlo sa ilang panglawas aron malikayan ang bisan unsang matang sa sakit sa mga open area evacuation center.
