Dakong hagit sa bag-ong PNP chief (Latest Sabong News)
Author
Javier T. Tapulado
Date
APRIL 28 2023
Miretiro na si Philipppine Ntional Police Chief Rodolfo Azurin Jr., kinsa bisan sa iyang pag-ingon nga he did his best, daghang mabinantayong citizen ang nakapangyamiid sa mao niyang pangangkon. Kini tungod kay dili matakpan ang mga mata sa katawhan, kinsa nakasaksi kon giunsa niya pagdala ang nasudnong renda sa atong kapolisan?
Sakit man paminawon, sa pagka-PNP chief ni Azurin, namalik pagdagsang ug misamot kaabunda ang pagpangnegosyo'g shabu ug ubang matang sa illegal drugs.
Bisan sulod sa bilanggoan, nalutsan. Kay hasta mga heneral apil diay niining hugaw'ng dula nga iyaha sa illegal drug syndicates.
Ang hapit mousa ka toneladang shabu controversy, diin ubay-ubay'ng opisyal sa PNP ang nahilambigit, nga sa panan-aw ni DILG Secretary Ben Hur Abalos base sa nakuhang CCTV footage, gustong takpan ni Azurin, wala pa niini mahatagi'g igong katin-awan nga hingpit makakombinse ug makahanaw sa pagduda ni Abalos.
Unya, ang Negros Oriental Governor Roel Degamo’s killing. Diin human masugdi ang imbestigasiyon didto sa Senado, nasayran, base sa mga alegasyon nga gipagawas ni Pamplona Mayor Janice Degamo, asawa sa governor, ug ni Siaton Mayor Cezanne Fritz H. Diaz, nga ang tanang kapolisan kuno nga naasayin sa Negros Oriental, gikan sa kinagamyang ranggo ngadto sa kinatas-an, kontrolado kuno sa mga pamilyang Teves, kinsa migamit sa kita sa ilang mga ilegal negosyo: e-sabong on line ug Small Town Lottery nga pangdatong sa naasoyng kapolisan.
Buwahan, tanang mga magbabalaod mahigtan nila sa liog. Ug kutob sa unsay isugo sa mga Teves, matuman.
Sa laktod, ang pagretiro ni Azurin isip kinatas-ang opisyal sa PNP kang kansang trabaho mao ang pagpanglimpyo sa tanang sagbot sa katilingban, wala niya mahimo.
Hugaw nga nataran sa panerbisyo ang gibilin ni Azurin ngadto sa bag-ong gipili ni Presidente Bongbong Marcos nga PNP Chief, Police Major General Benjamin Acorda Jr., kinsa sa iyang diskurso, misaad:
“My stand in anti-illegal drugs is clear. No police should be involved of pushing, using or whatever means of illegal drugs trade.
You will be charged of and removed from the service. This is my warning to each and every one of you.”
Pagkalalim pamation. Makabuhi sa himalatyong paglaom. Atong tan-awon, kon iya bang tinud-on?
