Tigbakay higpit nga gidili sa Lapu-Lapu (Latest Sabong News)
Author
Romeo T. Limpangog
Date
APRIL 24 2023
CEBU, Philippines — Walay legal nga tigbakay sa Siyudad sa Lapu-Lapu nga maoy hinungdan nga daghan sa mga sugarol sa masikop matag semana.
Diin sukwahi kini sa Lalawigan sa Sugbo nga giingong si Gobernador Gwendolyn Garcia nipadayag sa dili pagdakop kon adunay pagtugot gikan sa mga mayor ilabina kong panahon sa pagsaulog sa tinuig nga pista.
Si Police Colonel Elmer Lim, direktor sa Lapu-Lapu City Police Office (LLCPO) nagkanayon nga gumikan kay higpit nga gidili ang tigbakay mao usab ang hinungdan nga daghang sugarol og tigbakay ang madakpan sa matag semana.
Gitataw ni Lim nga ang legal nga pagtari sa mga manok anha lang sa sulod sa mga cockpit arena.
Matud ni Lim nga ang buwang sa sulod sa mga cockpit arena wala usab itugot nga himuon atol sa mga adlaw nga tingtrabaho diin sa mga adlaw nga Sabado, Domingo ug holiday lang kini gitugot.
Matud ni Lim nga hugot usab nilang gi-monitor ang mga cockpit arena tungod kay ilang gisiguro nga dili kini magamit sa ilegal nga e-sabong. (Romeo T. Limpangog/BDB)
Chan nitanyag og P20 mil sa makasumbong sa mag-vandal
Si Mayor Junard “Ahong” Chan nitanyag og P20,000 nga ganting salapi gikan sa iyang kaugalingong panudlanan alang niadtong mga molupyo nga makatumbok sa mga gi-vandal sa kadalanan nga nakuhaan og mga hulagway ug masikop ang mga responsible niini.
Gihimo ni Chan ang maong pamahayag niadtong niaging adlaw atol sa pagpresentar sa kapolisan sa Lapu-Lapu City Police Office (LCPO) sa duha ka menor de edad nga lalaki nga ilang nadakpan sa akto nga naghugaw-hugaw sa kadalanan pinaagi sa pagpintal niini.
Ang maong duha ka suspetsado gitugyan ni Chan ngadto sa buhatan sa City Social Welfare and Services Office alang sa tukmang lakang nga pagahimuon ngadto kanila.
Gipasabot ni Chan nga ang mga pag-vandal nga himuon diha sa kadalanan sa Dakbayan sa Lapu-Lapu makahatag kini og dakong epekto sa gihingusgan karon sa kagamhanan sa siyudad nga cleanliness and beautification program.