Tigbakay sa kabarangayan magpabiling illegal – Rama (Latest Sabong News)
Author
Sanden J. Anadia
Date
APRIL 25 2023
CEBU, Philippines — Gipadayag ni Cebu City mayor Michael Rama nga igo ra gyud siya nga motuman sa gilatid sa balaod busa magpabiling illegal ang mga tigbakay diha sa mga sitio ilabi na kun padulong ang pista.
Suma pa sa mayor nga base sa balaod, ang mga cockpit arena ra gyud nga dunay permit maoy gitugotan nga maka-operate.
Gani wala niya gi-entertain ang mga organizer og tigbakay nga mananghid kaniya.
Aminado siya nga nakasuway na siya kaniadto og tigbakay ug puwerte niyang dagan sa dihang gi-raid.
Dugang pa ni Rama nga dunay higayon kaniadto nga duna siyay kaliwat nga nagpa-tigbakay sa Rama Compound ug iyaha kining giparonda sa kapolisan.
Una na nga gitinguha ni Cebu City Councilor Pastor Jun Alcover Jr. nga tukion ang legalidad sa sabong sa kabaranggayan ilabi na nga nagbaha ang mga pista karong panahona.
Usa ka executive session ang himoon karong Mayo 3, 2023 alang sa lapad nga diskusyon sa maong butang.
Ang umaabot nga executive session tambongan sa mga representante sa Cebu City Police Office, Cockpit Operators, mga mahiligon sa sabong, Cebu City Gamefowl Commission, Office of the Mayor, ug Association of Barangay Council.
