Germudo magpabiling OIC, Oliva gihulga ni Teves? (Latest Sabong News)
Author
Decemay P. Padilla
Date
APRIL 20 2023
CEBU, Philippines — Nimando ang dirketor sa Police Regional Office-7 Brigadier General Anthony Aberin kang Police Captain Allen Germudo nga mopatim-aw ug mo kooperar sa senate inquiry kalabot sa Degamo case.
Ang pangalan ni Germudo naapil kini sa mga Teves dihang si Siaton Mayor Fritz Diaz nibutyag nga giingong bagman si Germudo ug maoy mohatag og kwarta sa mga polis gamit ang kita sa online sabong ug Small Town Lottery (STL).
Matud ni Police Lieutenant Colonel Gerard Ace Pelare, tigpamaba ni Aberin nga sila usab sa PRO-7 mohimo og imbestigasyon kabahin sa maong pasangil batok kang Germudo. Sa iyang bahin, si Germudo nihimakak sa maong pasangil batok kaniya ug matud niini nga na-relieve na siya gikan sa NegOr sa niaging tuig pa.
Si Germudo magpabilin kini isip officer-in-charge sa Tabuelan Municipal Police Station tungod kay wala pay order nga marelibohan kini sa maong pwesto.
Subay niini, gibutyag sa direktor sa Natioinal Bureau of Investigation-7 Rennan Augustus Oliva nga gihulga siya ni Negros Oriental Congressman Arnolfo “Arnie” Teves sa niaging tuiga nga ikiha uban sa mga personnel niini sa NBI. Kini human sa ilang gihimong operasyon batok sa usa ka e-sabong diha sa Barangay Calajoan, Lungsod sa Minglanilla niadtong buwang sa Septiyembre sa niaging tuig.
Si Oliva apil kini sa gidapit nga motambong sa Committee on Public Order and Dangerous Drugs senate hearing kagahapon kalabot pagpatay kang Negros Oreintal Governor Roel Degamo niadtong niaging bulan.
Niadtong Abril 18, atol gihapon sa maong hearing, si Pamplona Mayor Janice Degamo, asawa sa gipatay nga gobernador nibutyag nga giadto ni Teves ang NBI-7 sa Cebu kalabot sa gihimong raid sa e-sabong sa maong ahensiya. Si Janice nipasangil nga ang kwarta sa mga Teves gikan sa e-sabong ug STL.
Si Oliva nikompirma nga niadtong Septiyembre 20, 2022 pasado alas 3:00 sa hapon nianha sa iyang buhatan si Teves uban ang pipila ka pa ka indibidwal o “entourage” niini. —