Garcia: Mga buwangan dili iparonda kun dunay permit (Latest Sabong News)
Author
Le Phyllis F. Antojado-Orillaneda
Date
APRIL 15 2023
CEBU, Philippines — Si Gobernador Gwendolyn Garcia mimando sa Philippine National Police (PNP) nga hunongon kining pagpangronda sa kapolisan sa mga lehitimong buwangan sa mga kalungsoran nga adunay mga ordinansa o balaod nga nag-regulate sa operasyon niini.
Atol sa tigom sa gobernador uban sa opisyal sa Cebu Police Provincial Office (CPPO) gipangulohan ni Police Colonel Rommel Ochave ug pipila ka mga mayor sa probinsya, ang hepe sa CPPO nagkanayon nga ang regional director sa Police Regional Office (PRO-7) nga si Brig. Gen. Anthony Aberin niluwat og kamandoan alang sa kapulisan aron panghingusgan ang operasyon batok sa ilegal nga sugal.
Sa taho sa Capitol Information Office, ang mayor sa Catmon nga si Avis Monleon nibutyag nga usa ka makeshift cockpit o sabongan sa ilang barangay ang gi-raid atol sa pista sa maong barangay bisan pa man nga adunay permit nga giluwatan niini.
Apan si Ochave nagkanayon nga ma-konsiderar gihapon kini nga “illegal” tungod kay base sa Presidential Decree No. 449 o ang Cockfighting Law of 1974 nagmando nga ang susamang mga kalihokan angay ra ipahigayon sa mga lisensyado nga sabongan o arena ug ipahigayon ra matag adlaw nga Domingo, holidays ug lokal nga pista.
Apan si Garcia nagkanayon nga ang particular nga probisyon sa PD 449 hagbay ra nga na “repeal” pinaagi sa Akta Republika 7160 o ang Local Government Code (LGC) of 1991.
Nga kun diin nakalatid sa section 447, paragraph 3, v sa LGC nga ang mga Sangguniang Bayan sa LGUs makahatag og otoridad ug lisensya sa mga establisemento, operasyon ug maintenance sa mga cockpit o buwangan ug maka-regulate sab niini apil na ang commercial breeding sa mga manok igtatari.
“P.D. 449 can no longer be used as reason to declare as illegal cockfighting which is authorized by the Sangguniang Bayan,” matud ni Garcia ngadto kang Ochave sumala sa Sugbo News, ang news portal sa Probinsya sa Sugbo.
Si Garcia nagkanayon nga ang sabong sa mga barangay atol sa pista dili lang tradisyon lukop Pilipinas, nahimo na pud kining tinubdan sa pangita dili lang sa mga mamusta kondili apil na pud sa mga tindera o tindero sa mga pagkaon ug ilimnon nga naninda duol sa mga buwangan.
Si Ochave nihangyo ngadto sa mga Mayor nga hatagan ang CPPO og kopya sa mga ordinansang gipasar sa tagsa-tagsa nga Sangguniang Bayan sa mga lungsod ug siyudad sa Probinsya kalabot sa regulasyon ug guidelines sa pagpahigayon og sabong sa ilang mga lugar aron malikayan ang dili pagkasinabtanay sa mga LGU ug sa kapulisan.—
