Garcia: Sabong legal kon may pagtugot sa LGU; PNP gibadlong (Latest Sabong News)
Gusto ni Cebu Governor Gwendolyn Garcia nga hunungon na sa kapulisan ang pagpang raid sa mga tigbakay sa kalungsoran sa probinsya sa Sugbo kon dunay pagtugot sa lokal nga kagamhanan ug sa mayor.
Subay sa nagkaduol nga panahon sa mga pista sa Mayo, gitigom ni Garcia ang Philippine National Police (PNP) aron mahunong ang pagpangronda sa mga awtorisadong sabong sa mga lokalidad sa probinsya.
Atol sa tigom kauban ang mga mayor, gipahibaw ni Catmon Mayor Avis Monleon nga nahibulong siya sa gihimong pagpangronda sa kapulisan sa usa sa mga barangay sa Catmon bisan kon gitugotan niya kini, taho sa Sugbo News, media arm sa Kapitolyo.
Atol sa tigom, si CPPO Director Police Col. Rommel Ochave nagkanayon nga ang ilang pagpangronda sa nagkadaiyang sabongan nahisubay sa Presidential Decree No. 449, o Cockfighting Law of 1974, nga nagmando sa pagpahigayon lang niini sa licensed arenas, matag Dominggo, holidays, ug local fiestas.
Apan ang gobernador nipasabot nga ang PD 449 dugay nang gi-repeal kun giusab ang probisyon human nahimong balaod ang Republic Act 7160 o Local Government Code.
Gihimug-atan ni Garcia ang nahisubay sa Section 447, paragraph 3, sa Code nga naghatag og gahom sa Sangguniang Bayan sa mga LGU sa pag “authorize and license the establishment, operation, and maintenance of cockpits, and regulate cockfighting and commercial breeding of gamecocks”.
Matod ni Garcia nga subay niini, dili na madeklarar nga ilegal ang usa ka tigbakay kon kini may pagtugot sa lokal nga kagamhanan ug mayor.
“PD 449 can no longer be used as reason to declare as illegal cockfighting which is authorized by the Sangguniang Bayan,” pagpasabot ni Garcia.
Si Daanbantayan Mayor Mayor Sun Shimura, pangu sa League of Municipalities of the Philippines (LMP) Cebu Chapter, nagkanayon nga ang pagpahigayon og sabong ngadto lang sa mga lisensyadong arenas mahimong dakong kabug-aton sa mga konstituente niini ilabi na nga gikinahanglan pa nga mobiyahe ang mga nagpuyo sa bukirang mga barangay aron lang makaapil.
Apan pasabot ni Garcia nga ang tigbakay atol sa fiesta, dili lang kabahin sa tradisyon o naandan, apan nahimo usab nga source of income sa daghang mga mananari ug vendors.
