E-sabong gironda; nag-CR ray nasikop; 128 ka manok nasakmit (Latest Sabong News)
Trabahante sa e-sabong napusasan human wala makadagan kay nagtubag sa sugo sa lawas sulod sa kasilyas dihang gironda sa kapulisan alas 7:30 sa buntag sa Lunes sa bukirang lugar sa Brgy. Bugho, lungsod sa San Fernando.
Si Don Cesar Caballero, 22, dunay kapuyo, taga Brgy. Lagtang, dakbayan sa Talisay, napusasan samtang ang iyang pito ka mga kauban nakaeskapo sa ronda.
Si Caballero, nga nahinabi sa Superbalita Cebu, nagkanayon nga usa ka semana na siya nga nagtrabaho sa Gladiators Farm.
Ngan sa operator gipugngan una ning mantalaan samtang gisusi pa sa kapulisan ang katinuoran.
Matud niya nga nakahibalo siya nga ilegal ang e-sabong apan gumikan kay walay laing trabaho ug duna siyay unom ka bulan pa nga anak, iyang gidawat ang trabaho nga tigkupot sa mga manok nga tauran og buwang alang sa sultada.
Ang iyang sweldo P500 matag adlaw.
Asoy niya nga magsugod ang sultada gikan sa alas 5:00 sa buntag hangtud sa pagkakaadlawon sa sunod adlaw.
Kada adlaw dunay 200 ka mga manok ilang matari.
“Nali____man ko ato dihang naabot ang mga pulis. Wala na ko makadagan. Wala gani ko kapa_____,” dugang ni Caballero.
“Kay pulis naman nanuktok sa pansayan, nigawas ko. Ako na lang nahibilin kay nanagan akong mga kauban,” asoy niya.
Si Police Col. Fidel Fortaleza, Jr., hepe sa Regional Anti-Cybercrime Unit (RACU7), maoy nangulo sa joint operation uban sa mga sakop sa Regional Intelligence Division (RID7), Regional Mobile Force Battalion( RMFB7), Provincial Intelligence Units (PIU) San Fernando Police Station.
Si Fortaleza nagkanayon nga nasubay nila ang lugar human sila nakadawat og impormasyon.
Samtang ilaha pang giimbestigar kon si kinsa ang operator sa e-sabong.
Ang mga mosugal gikatahong mo log in sa DS88.live, goperya.com website. Dinhi makapusta sila sa e-sabong.
Dihang nasubay nila, ilang gipahigayon ang operation diin naaktuhan nila ang mga suspek nga aktong nagpahigayon sa illegal cockfighting activity gamit ang Information Communication and Technology (ICT) alang sa e-sabong/ online sabong activity.
Narekuber sa kapulisan ang cameras, 128 ka fighting cocks, 28 sab ka mga bihag, bet money, computers ug uban pang ICT equipment.
Ang pito ka mga kawani sa e-sabong nakasibat dihang nakamatikod sa kapulisan.
Si Caballero pasakaag kasong kalapasan sa PD 449 (illegal cockfighting) ug PD1602 (illegal gambling) nga may kalambigitan sa Section 6 sa Republic Act 10175.
