Sabong balik na sa Davao (Latest Sabong News)

GOOD news alang sa mga sabongero labi na sa taga Davao City gumikan subli na sab nga gibuksan ang operasyon sa usa sa mga iladong sabungan ning siyudad nga mao ang New Matina Gallera sa McArthur Highway, Matina. Sa hulagway nga kuha ni R.A BigBro, makita nga naglinya ang mga sabongero gawas sa New Matina Gallera sa McArthur Highway, Matina, Davao City, pasado alas 9 Dominggo sa buntag, Enero 8, 2023. Giablihan na ang maong sabongan human nga nasira gumikan sa Covid-19 pandemic. Sumala sa usa ka sabongero nga si Esmael Camporedondo, 45-anyos, nalipay siya kay naa na sab kalingawan nga kung suwertehon makakuwarta gayod. "Nindot oi, kay kung suwertehon ka, kuwarta man gyod, maayo na lang kay nabalik na," sulti ni Camporedondo nga nahinabi sa SuperBalita Davao pinaagi sa Messenger kagahapon. Gawas sa sabongan, dunay mga pulis sa Talomo Police Station nga nagbantay aron pirmi nga magpahinumdom sa mga nanulod nga magsuot gayod og face mask. Gikompirma ni Business Bureau head Maribel Paguican ngadto sa SunStar Davao sa text message nga ang lokal nga panggamhanan sa Davao mihatag og permit alang saa operasyon sa cock derby. Matud ni Paguican nga ang Matina Gallera mao la'y dunay kasamtangan anga derby nga dunay "existing permit" sa operasyon. Ubang mga sabongan duna say tinguha nga mo-aplay, apan wala pa sila makatuman sa mga rekisitos sa lokal nga panggamhanan naglakip sa "building and fire clearance permit". "Si Matina Gallera pa lang ang naay permit. To follow pa ang uban. Last year pa naa na ang clearance provided na ma-comply ang ginapangayo sa city. Wala man naapas last year pa," tug-an sa opisyal. Samtang si Konsehal Bernie Al-ag sa paghinabi sa radyo niadtong Biyernes, Enero 6, nagsulti nga ang Konseho nag-aproba sa pagbalik sa tinawo nga operasyon sa sabong Disyembre 2022. Apan, matud niya nga ang siyudad nag-imposar og kapin 50 porsiyento nga pagtaas sa buhis sa ilang operasyon. "Gusto nato na maka-contribute siya sa taxes sa Davao kay gamiton pud nato isip mga proyekto ug serbisyo sa katawhan sa syudad," pagsaysay sa konsehal sa paghinabi kaniya sa DXGM Super Radyo Davao. Si Al-ag nagkanayon nga ang mga tigpasiugda sa derby mahimo nang makaaplay alang sa ilang business permit, basta motuman sa rekisito sa siyudad. Gipaningkamotan sa SuperBalita Davao nga makuha ang bahin sa New Matina Gallera sa subling pagpahigayon sa ilang operasyon apan wala pay pahayag. Kahinumdoman nga sayo niadtong tuig 2020, gitaho ang daghang ihap sa mga sabongero nagpositibo sa coronavirus disease kinsa nanabong niadtong mga taknaa. Gitawag nga "ground zero" kun giingon nga diri ang unang dunay daghang natala nga kaso sa Covid-19 sud lamang sa usa ka higayon atol sa sabong. Bulan sa Marso 2020, napatuman ang hugot nga quarantine restrictions sa Davao City ug sa tibuok nasud gumikan sa Covid-19 ug gideklara kini nga pandemic sa World Health Organization.