P184 milyong drugas nasakmit sa CPPO sa 2022 (Latest Sabong News)
Author
Decemay P. Padilla
Date
JANUARY 04 2023
CEBU, Philippines — Moabot sa P184.5 million nga balor sa shabu ang nakompiskar sa Cebu Police Provincial Office (CPPO) sa tibuok tuig 2022 sa wala’y hunong nga anti-illegal drug operations nga miresulta sa pagkasikop sa 2,791 ka drug personalities ug pagpasaka og 4,967 ka kaso.
Nakakompiskar sab ang kapulisan og 51,493.57 grams sa marijuana nga mokantidad og P6.1 million. Gihulagway sa kapulisan nga ang deklarasyon ni Cebu Governor Gwendolyn Garcia nga all-out-war against illegal drugs ingon man ang wala’y paglubad nga suporta sa organisasyon dako og tabang sa kampanya sa PRO-7 batok illegal nga drugas.
Ang paglusad sa One Cebu Inter-Agency Interdiction Task Force produkto sa tinguha nga mawagtang ang pagkayunap sa illegal drugs sa Probinsiya sa Sugbo.
Gihingusgan sab kapulisan ang ilang manhunt batok wanted persons diin ang pagkasikop ni Winefredo Durado, kinsa apil sa Most Wanted Person ug dunay reward tungod sa kasong murder ug nagtago sa balaod sulod sa 31 ka tuig.
Sa tuig 2022, 402 ka Most Wanted Persons ug 2,816 ka other Wanted Persons ang nasikop.
Gihingusgan sab sa Cebu Police Provincial Office ang kampanya batok loose firearms ug sa usa ka tuig nakasikop sila og 250 ka indibidwal ug nakakompiskar og 2,428powered firearms, 12 high-powered firearms, ug 28 ka explosives ug napugngan nga kini magamit sa mga illegal nga kalihukan.
Wala sab sila mohunong sa ilahang kampanya batok E-sabong ug ubang klase sa illegal gambling.
Nakapahigayon ang kapulisan og massive operations batok sa mga malapason hinungdan nga 4,329 ka personalities ang nadakpan ug 1,616 ka kaso ang na-file sa prosecutor’s office ug P573 thousand nga bet money ang nakompiskar.
Aron masiguro nga hapsay ang komunidad gipatuman sab ang local ug traffic ordinances diin 74,638 ka indibidwal ang nadakpan ug gipamulta maong niabot sa P21.2 million pesos ang nahipos nga multa sa kinatibuk-an.
