Camera at betting machines sa sabungan, kumpiskahin! (Latest Sabong News)
Author
Non Alquitran
Date
JANUARY 02 2023
PARA magtagumpay ang patuloy na pagsuspende ni President Bongbong Marcos sa operasyon ng online sabong, kailangan baklasin ng PNP ang mga camera sa sabungan pati na ang mga makina na tayaan. Sa biglang tingin, may ngipin na itong kautusan ni BBM subalit alam n’yo naman mga kosa gagawa at gagawa ng paraan itong mga gambling lords para mapaikutan ito. ‘Ika nga, palaging one step ahead itong mga gambling lords kumpara sa gobyerno. Mismooooo!
Sa pagpatuloy na pagsuspende n’ya ng online sabong, tinupad lang ni BBM ang kanyang pangako noong panahon ng kampanya na hindi n’ya papayagan na mamayani ito dahil sa kaso ng 34 missing sabungeros.
Palakpakan natin mga kosa kong 31 milyon itong desisyon ni BBM, kung saan tinalikuran n’ya ang P5 bilyon na kita sa online sabong. Sa utos na ito ni BBM, ang tinamaan ng delubyo ay itong mga bigtime na gambling lords na sina Bong Pineda at mahigpit na karibal na si Charlie “Atong” Ang at iba pang online sabong operators na nasa listahan ni Sen. Bato dela Rosa, di ba mga kosa? Dipugaaaaa! Sa tooo lang, itong mga tropa nina Pineda at Ang ay t’yak na nag-iisip na sa ngayon kung paano malusutan itong kautusan ni BBM. Ano sa tingin n’yo mga kosa? Eh di wow!
Napaloob sa dalawang pahinang kautusan ni BBM na balik tradisyunal sabong na ang maging operations ng mga sabungan na may permit. No way pa ang mga walang permit. Bawal ang online, remote at off-cockpit bettings sa cockfighting events, live streaming o broadcasting nito. Araguuyyyyy! Bilyones ang mawawala sa bulsa nina Pineda, at mga kasamang online sabong operators, di ba mga kosa? Eh di wow!
Iginiit pa ni BBM na ang Pagcor lang, sa coordination ng mga Local Government Units (LGUs) at iba pang sangay ng gobyerno tulad ng Philippine National Police, ang may karapatang mag-implement ng kanyang kautusan. Matatandaan na nagbukas kamakailan lang si Ang ng kanyang online sabong gamit ang lisensiyang galing sa Games and Amusement Board (GAB). Tsk tsk tsk! Ano ba ‘yan? Si Interior Sec. Benhur Abalos at ang PNP ay inutusan na makipagtulungan sa Pagcor para kitlin ang operations ng matitigas ang ulo na mga online sabong operators. Dipugaaaaa! Kelangan pa bang i-memorize ‘yan?
Sa tingin ng mga kosa kong sabong afficionado, mahihirapan ang PNP na mapatigil itong online sabong dahil armado ng kung anu-anong paraan ang mga gambling lords para itago ang kanilang operations. Subalit kapag, kinumpiska nila ang camera at mga betting machines sa mga sabungan, eh 100 porsiyento na hihinto na ang online sabong.
Kaya’t dapat iutos ni Sec. Abalos sa PNP na itong camera sa mga sabungan at betting machines i-focus ang effort nila para hindi masayang ang pondo at makinarya nila, di ba mga kosa? Hehehe! Alam naman natin mga kosa na maraming Pinoy ay paboritong hobby ang sabong, kaya lang naibsan ang pamamaraan kung paano sila tataya sa kautusan ni BBM. Pumunta na lang kaya kayo mga kosa kong adik sa sabong sa mga sabungan at magsigawan kada sultada, di ba mga kosa? D’yan safe pa kayo sa huli. Abangan!
