EDITORYAL - Pati asin mataas na rin (Latest Sabong News)
Katataas lamang ng presyo ng tinapay, instant noodles, sardinas, karne, corned beef, meat loaf, gatas, naka-botelyang inuming tubig, sabong pampaligo, sabong panlaba, battery, kandila, asin at marami pang iba at ngayon ay magtataas na naman, ayon sa Department of Trade and Industry (DTI).
Inaprubahan na ng DTI ang suggested retail prices (SRPs) ng 82 produkto na kinabibilangan ng sardinas, gatas at instant noodles dahil umano sa malaking gastos sa produksiyon ng mga ito. Inaprubahan ng DTI ang SRPs noong Mayo 11. Kabilang pa sa mga produkto na magtataas ang presyo ay ang asin, sabong panlaba, delatang karne, corned beef, kape at battery.
Ang pagtataas ng presyo ng mga pangunahing bilihin ay kasabay din sa pagtataas ng mga produktong petrolyo. Halos linggu-linggo ang oil price hike na pasaning mabigat sa mga motorista. Higit na kawawa ang mga drayber ng public utility vehicles (PUVs) partikular ang jeepney at bus dahil wala na silang maiuwi sa pamilya. Napunta na lahat sa diesel.
At ngayong magtataas na naman ang mga presyo ng pangunahing bilihin, saan na hahantong ang buhay ng mga mahihirap na isang kahig, isang tuka. Kahit ang mga nagdidildil ng asin ay apektado rin sapagkat maski ito ay magtataas din. Ang iodized rock salt na 500-g ay magiging P15.70 na mula sa dating P11.25.
Dahil sa pagtaas ngbilihin, hindi na magkasyaang P537 na arawang kita ng mga manggagawa sa Metro Manila. Nagdagdag ng P33 subalit kulang na kulang. Bukod sa mataas na bilihin, nagbabayad pa ng upa sa bahay, bayad sa kuryente at tubig. Humihiling ang mga manggagawa na itaas sa P650 ang minimum wage para makahabol sa mataas na presyongbilihin. Kawawa naman ang kakarampot ang suweldo na pinagkakasya lamang para makaraos sa maghapon.
Magpapalit na ang administrasyon sa susunod na buwan at sana makagawa ng paraan ang bagong pamahalaan para mapababa angpresyong mgabilihin. Una nang sinabi ni incoming president Bongbong Marcos na pabababain ang presyo ng bigas sa halagang P20 bawat kilo.Sana mangyari ito para naman maibsan ang hirap ng mga isang kahig-isang tuka na kahit asin ay mataas na rin ang presyo. Kawawa ang mga magdidildil ng asin.
