EDITORYAL - Maraming mawawasak sa pagpapatuloy ng e-sabong (Latest Sabong News)
HINDI na baleng may mga mawasak na kinabukasan basta nag-aakyat ng pera sa kaban ng bayan. Okey lang na may malulong sa sugal basta nagbabayad ng bilyong buwis ang establisimentong nagpapasugal. Kung ganito ang patakaran, patawan na rin ng buwis ang mga nagpapakalat ng droga o ang mga drug syndicates para malaki ang iaakyat na buwis sa bansa. Patawan na rin ng buwis ang mga sangkot sa white slavery at mga prostitution den para sumagana ang bansa sa rami ng iaakyat na buwis.
Halos ganito ang gustong mangyari ng pamahalaan dahil sa pagtutol mismo ni President Rodrigo Duterte na huwag suspindihen ang online sabong o e-sabong. Sinabi niya sa kanyang public address noong Miyerkules na bilyong piso ang kinikita ng gobyerno sa online sabong. Sabi niya, kailangan ng gobyerno ang kita mula sa online sabong.
Nanawagan siya sa mga mambabatas na huwag na lang pansinin ang e-sabong dahil kumikita at nakikinabang ang Philippine Amusement and Gaming Corporation (PAGCOR). Malalaking players umano ang naglalaro sa e-sabong.
Noong nakaraang buwan, nagpatawag ng hearing ang Senado na pinamumunuan ni Sen. Ronald dela Rosa at nagkaroon ng resolusyon para sa suspensiyon ng e-sabong. Ang suspensiyon ay nag-ugat sa misteryosong pagkawala ng 31 sabungeros. Kasama sa ipinatawag ng Senado ang PAGCOR. Sinabi ni Dela Rosa na pumayag umano ang Presidente na suspindihen ang e-sabong. Samantala, wala pang natatagpuan sa mga nawalang sabungeros.
Habang sinasabi ng Presidente na malalaking players ang naglalaro sa e-sabong, may lumutang namang babae na nagbenta ng sanggol sa halagang P45,000 para mabayaran ang malaking pagkakautang sa e-sabong. Mayroon ding OFW na nalulong sa e-sabong at naipatalo ang kanyang separation pay. May mga karaniwang manggagawa na ang kahit pambili nila ng bigas para sa kanyang pamilya ay itinataya sa e-sabong at naipatalo.
Ngayong ang Presidente na mismo ang nagsabi na malaki ang kinikita ng gobyerno sa buwis na nakukuha sa e-sabong, marami pa ang magkakalakas ng loob na ipagpatuloy ang iba’t ibang sugal sa bansa. At asahan nang marami pang mawawasak na kinabukasan dahil sa pagkalulong sa sugal, partikular na sa e-sabong. E ano ba, malaki naman ang kinikita.
