Lebanon pasok sa quarterfinals (Latest Sabong News)
Author
John Bryan Ulanday
Date
JULY 18 2022
MANILA, Philippines — Winalis ng Lebanon ang Group D matapos ang tambak na 104-63 panalo kontra sa India papasok sa quarterfinals ng 2022 FIBA Asia Cup sa Jakarta, Indonesia.
Nakumpleto ng Cedars ang 3-0 kartada para sa No. 1 spot at awtomatikong tiket sa quarterfinals matapos din ang 95-80 at 86-72 panalo sa Gilas Pilipinas at New Zealand, ayon sa pagkakasunod.
Swak na rin sa quarterfinals ang top teams na Australia ng Group A at South Korea ng Group B, habang maglalaban pa ang Japan at Iran hawak ang parehong 2-0 kartada sa krusyal na duwelo sa Group C para masungkit ang huling outright ticket sa quarterfinals.
Dahil apat na ang papasok sa playoffs, magsasabong ang walong teams tampok ang No. 2 at No. 3 squads ng kada koponan sa qualification phase para sa huling apat na quarterfinals seat.
Ito ang sasalihan ng Gilas na sigurado na sa qualification phase subalit malalaman pa lang kung sa No. 3 o No. 4 magtatapos kontra sa New Zealand.
Nakalinyang makatapat ng Gilas ang No. 2 o No. 3 team sa Pool C na posibleng maging Japan, Iran o Kazakhstan.
Parehong may 1-1 kartada ang Gilas at New Zealand matapos yumukod sa Lebanon at tambakan ang India, na laglag na sa kontensyon hawak ang 0-3 kartada.
Umiskor ng 101-59 panalo ang Gilas kontra India na tinalo din ng New Zealand, 100-47.
Tangka ng Gilas na makaabot uli sa quarterfinals at magtuluy-tuloy sa dulo matapos ang seventh place finish noong 2017 edition na ginanap sa Lebanon.
Bahagi ang Asia Cup ng mahabang preparasyon ng Gilas para sa 2023 FIBA World Cup tampok ang Pilipinas bilang main host kaya pasok na agad sa torneo.
