EDITORYAL – Desaparecidos sabungeros (Latest Sabong News)
Magtatatlong Pasko na ngayon na hindi makakapiling ng kanilang mga mahal sa buhay ang nawawalang 34 na sabungeros na mga nawala noong 2020 hanggang 2022. Ang mga sabungeros ay dinukot sa iba’t ibang lugar—Maynila, Bulacan, Rizal at Laguna. Ang ilan sa kanila ay dinukot sa mismong sabungan. At ang mga dumukot ay mga pulis. Katunayan, may limang pulis nang inaresto dahil sa pagdukot sa master agent na si Ricardo Lasco ng San Pablo City, Laguna. Ang mga pulis ay kinilalang sina Staff Sgt. Daryl Panghangaan, Patrolman Roy Navarette, Patrolman Rigel Brosas, Lieutenant Henry Sasaluya at Master Sergeant Michael Claveria.
Medyo nakahinga nang maluwag ang mga kaanak ni Lasco pero ang kaanak ng 33 pang sabungeros ay may pag-agam-agam sa kanilang dibdib. Hindi nila alam kung nasaan na ang kanilang mahal sa buhay. Nagdagdag sa dalahin nila ang sinabi ni Justice Sec. Crispin Remulla na maaaring patay na ang mga sabungeros. Ganito rin ang sinabi ni dating President Duterte noong Marso ng kasalukuyang taon nang tanungin ukol sa mga nawawalang sabungeros. Posible aniya na patay na ang mga ito.
Sinabi naman ng Philippine National Police (PNP) na maaaring buhay pa ang mga sabungeros. Missing lamang umano ang mga ito at patuloy silang umaasa na matatagpuan ang mga ito. Hindi umano tumitigil ang PNP sa paghahanap sa mga nawawalang sabungeros.
Ayon sa PNP, nakikita nilang motibo sa pagkawala ng mga sabungeros ay bilang pagganti sa ginagawa umanong pandaraya ng mga sabungeros kung saan natatalo o nalulugi ang may-ari ng sabungan. Ayon pa rin sa imbestigasyon, sangkot ang mga nawawalang sabungeros sa game-fixing. Ipinatatalo ang laban sa pamamagitan ng pagbalda sa manok na panabong.
Nakalulungkot lang na pawang mga pulis ang itinuturong nasa likod ng pagkidnap sa mga sabungeros. Nakikita sa nangyayaring ito na laging sangkot ang mga pulis sa mga gawaing ilegal. Naghahatid ng pangamba na dahil mga pulis ang mga sangkot baka mawalan ng saysay ang lahat at hindi makakuha ng hustisya ang mga kaanak ng nawawalang sabungeros. Hindi sana magkaroon ng pagtatakipan sa kontrobersiyal na kasong ito. Gawin ang lahat para matagpuan ang mga desaparecidos sabungeros.
