Gamhanang kalyo (Latest Sabong News)
Author
Fred Languido
Date
DECEMBER 22 2022
Daghan ang natingala sa kalit nga paghulip kang Police Brigadier General Roderick Augustus Alba isip hepe sa Police Regional Office (PRO)-7 sanglit wala pa manginit ang iyang sampot sa lingkoranan.
Duha pa lang ka buwan kapin sukad siya moasumir sa katungdanan hulip sa miritiro na sa serbisyo nga si B/Gen. Roque Eduardo Vega. Basi sa lagda sa Philippine National Police (PNP) ang kasagarang termino sa usa ka regional director molanat og duh aka tuig.
Apan sa kaso ni Alba duha ka buwan lang kapin siya nga nadistino sa PRO-7 ug kalit nga gihulipan ni B/Gen. Jerry Bearis nga gikan sa PRO-3. Si Alba gibalhin og distino didto sa Camp Crame. Way klarong rason nga gihatag ang kadagkuan sa kapolisan nganong kalit girelibohan si Alba. Matud hinuon sa opisyal nga “career advancement” ni alang niya.
Bisan unsaon pa og alam-alam ni Alba ang iyang kaugalingon dili ikalimod nga “unceremonious” ang paghulip niya sa katungdanan. Moangkon man siya o sa dili apan alang sa mga opisyal sa kapolisan maisip nga demolition alang nila ang pagkuha og command.
Lisud tuohan nga “career advancement” ray rason nganong siya gihulipan sa pwesto kay kun buot huna-hunaon wala nalang unta siya idistino sa PRO-7 sulod lang sa duha ka buwan. Ambot unsa ka tinuod ang kasayuran nga akong nahipos nga ang tinuod nga hinungdan sa pagkatangtang ni Alba dinhi sa rehiyon mao ang sunod-sunod nga dakop nga gihimo sa iyang mga sakop batok sa e-sabong.
Kun nakabantay mo sulod sa pipila ka semana sa wala pa mogawas ang order sa Camp Crame nga naghulip niya sa pwesto, daghan ang mga nadakpan nga nalambigit sa online sabong. Diha pa gani toy nadakpan nga sakop sa adunahang banay.
Sigun sa akong tinubdan dunay usa ka gamhanang politiko dinhi sa rehiyon nga wala makaayon sa gihimo ni Alba ug nagpalaban sa Department of Interior and Local Government (DILG). Ug nahibawo namo unsay sunod nga nahitabo. Dunay kalyo sa gamhanang tawo nga natumban si Alba hinungdan nga sayo siyang namutos sa iyang mga gamit bisan wala pa manginit ang iyang lingkoranan.
