EDITORYAL -Hulipan bisan maayo og labok? (Latest Sabong News)
Makakurat ang kalit-kalit nga pag-relibo sa bag-ohay palang milingkod nga direktor sa Police Regional Office-7, Police Brigadier General Roderick Augustus Alba niadto lang adlaw nga Lunes .
Wala pa moinit ang bangko ni Alba diha sa PRO-7 sanglit magtulo palang kini ka bulan sukad nga milingkod sa maong buhatan hulip sa miretirong si kanhi Police BGeneral Vega.
Dunay nanggawas nga mga report nga giingong dunay impluwensiyadong politiko dinhi sa Central Visayas nga wala mahimuot kang Alba.
Ang rason tungod matud pa sa pagtutok niya sa kampanya batok sa ilegal nga drugas partikular na niini ang gideklarang ilegal nga e-sabong.
Matud pa ang maong politiko nasuko kang Alba tungod niini, wala hinuoy mikompirmar bahin niini ug kun kini bang politiko e-sabong lord.
Kung tinuod ang maong nanggawas nga huhungihong, tingali gisakitan na ang maong politiko tungod daghan na sa iyang mga sakop ang nangadakpan o ba kaha nimenus na ang kita nila gikan sa e-sabong kay wala na kaayoy moduwa niini gamit ang cellphone kay sikupon man.
Iyaha sab gipakinto ang mga ginsakupan pinaagi sa pag-isyu og one strike policy nga kadtong mga opisyal o polis nga magmika sa trabaho, iyaha gyung parelibohan karong bulan sa Enero.
Apan si Alba mibutyag sa mga tigbalita nga dili kini maoy rason. Matud pa niya, normal lang sa PNP ang kalit-kalit nga paglahugay ug relibohay sa posisyon.
Sa paglingkod ni Alba, daghang mga nangadakpang sugarol nga nalambigit o nagsugal pinaagi sa e-sabong. Duna say daghang nadakpan sa ilegal nga drugas nga milyon-milyon ka pesos ang kantidad, mga ilegal nga armas ug mga wanted.
Hulipan diay ang opisyal nga maayo og labok? Ilabi na nga nagsingabot na ang Pasko, Bag-ong Tuig ug ang labing dakong kapistahan dinhi sa rehiyon, ang Pista Senyor nga maoy gipahinungdan sa Sinulog.
Hinuon, isip usa ka maayong polis gipaabot nga dawaton ni Alba kun unsay kamandoan nga isanong kaniya. Bisan sa makadiyot niyang pagpangulo sa kapolisan sa rehiyon dako ang natampo.
