May mga pulis na lulong sa e-sabong (Latest Sabong News)
Author
Bening Batuigas
Date
DECEMBER 20 2022
KUNG nagiba man Philippine National Police (PNP) ang e-sabong sa Central Visayas, may mga tagong site pa rin pala itong gumagana. Kaya naman nagkukumahog ang PNP cybercrime sa ngayon na matunton sa mga website ang patuloy na e-sabong dahil marami na ang nawawasak ang buhay dahil sa pagkalulong sa nasabing sugal. Nitong mga nakalipas na araw, nagsagawa ng sunud-sunod na pagsalakay ang mga tauhan ni Police Regional Office 7 director B/Gen. Roderick Agustus Alba kung saan nalambat ang 283 mananaya subalit walang nahuling gambling operators at financers.
Hindi pa rin natitigil ang pagtaya sa mga tagong website ng e-sabong. Ang mga sultada kasi ng sabong na tinatangkilik ng mga sugarol ay mismong kuha rin sa mga sabungan sa iba’t ibang panig ng bansa na napapanood lamang sa mga tagong website at ang pusta at kubransa ay pinadadaan sa mga remittance center. Alam ng mga taga-PNP kung ano ang mga remittance center na ‘yan. Kaya ang bigtime financer ng e-sabong ay palaging busog ang bulsa at ang naiwang nakatulala ay ang mga gumon sa sugal. Ang kanilang pamilya ay nagkandagutom at ang mga ari-arian ay naibenta o kaya’y naisangla.
Kaya ang nararapat gawin ngayon ay ipagbawal na ang mga camera sa loob ng mga sabungan upang hindi na makunan ang ginaganap na sabong at ma-upload sa mga website na pinatatakbo ng sindikato. Kahit saang lugar sa bansa ay legal na ang pasabong dahil sa permisong nakukuha sa mga local government units matapos luwagan ang standard health oprotocols.
Nalaman ko na may mga pulis na lulong sa e-sabong katulad ni /SSgt. Conchito Payac Jr. ng Dawis police station sa Bohol na nagawang mangholdap ng gasolinahan. Nahuli si Payac at nabawi ang P8,000 na hinoldap sa gasolinahan. Umamin si Payac na nagumon siya sa e-sabong kaya nangholdap. Sinampahan na siya ng kaso at masisibak sa serbisyo.
Ito marahil ang dahilan kaya nabitin ang nakatakdang promosyon ng mga bagong opisyales ng PNP. Hindi nagustuhan ni PBBM ang aktibidades ng mga pulis ngayon. Dahil sa ginagawang ito ng mga pulis, lalo tuloy bumababa ang image ng PNP. Nadadamay din ang ibang magigiting na pulis dahil sa kabulastugan ng ilang pulis “anay’’. Tigilan na sana ang bisyong e-sabong.
