Pangandam sa promosyon ang rason pagbalhin kang Alba (Latest Sabong News)
Author
Decemay P. Padilla
Date
DECEMBER 21 2022
CEBU, Philippines — Career advancement maoy gibutyag ni Police Regional Office(PRO)-7 outgoing Regional Director Police Brigadier General Roderick Augustus Alba dihang gipangutana kun unsay rason nganong kalit kining gihulipan sa katungdanan.
Wala’y kalabutan matud pa ang nahitabo sa Probinsiya sa Bohol nga usa ka police ang nadakpan human giingong nanulis og gasoline station tungod kay naaksyonan man kini dayon ug kun maghisgot kampanya batok illegal sugal sama sa e-sabong usa ang PRO-7 sa matud sa taas og accomplishment diin kapin 300 ka mga tawo ang ilahang nadakpan nga nalambigit sa maong illegal nga sugal.
Gihulagway ni Alba nga normal sa ilahang propesyon ang mga ingon ani nga kausaban ug isip maayong police officer mosunod sila kun unsa may mando nga ihatag ngadto nila.
“I return to the basic premise of our transfer and relief it’s normal for us because we follow orders. (Career advancement) Yes, definitely dahil ito ay preparatory to two-star rank later on if given the chance,” matud ni Alba.
Gipahigayon kagahapon ang turnover of office ceremony sa PRO-7 Headquarter sa Camp Sergio Osmeña Boulevard, siyudad sa Sugbo diin ang ilahang guest speaker ingon man nag-preside sa kalihukan mao si Police Lt. General Patrick Villacorte, Commander sa APC-Visayas.
Sa mensahe ni Alba, nagpasalamat sa mga tawong mitabang kaniya sulod sa kapin duha ka buwan niya nga paglingkod sa PRO-7 aron magmalampuson ang mga programa aron batukan ang tanang klase sa kriminalidad.
Mapasigarbuhon siya nga mobiya sa PRO-7 tungod kay nadeklarar ang Police Regional Office-7 nga taas ang pakunhod sa krimen, gikan sab sa ika-15 nga pwesto nisaka sa ikalima sa Unit Performance Evaluation Rating(UPER). Gawas niini, daghan sab og nadakpan, kaso napasaka ug mga ebidensiya nga nakompiskar ang PRO-7 sa illegal drugs ug apil sab siya sa pag-umol sa One Cebu Inter-Agency Interdiction Task Force nga dako og natabang aron masulbad ang problema sa ginadiling drugas sa Sugbo.
Dako sab ang pagsalig ni Alba sa bag-ong Regional Director sa PRO-7 Brigadier General Jerry Bearis nga mas mapalambo pa niini ang mga programa sa PRO-7 ug miapelar si Alba sa mga kaubanan nini nga suportahan si Bearis.
Si Bearis sa iyang bahin miawhag sa iyang mga ginsakupan nga ipadayon ang kadasig nila sa paghimo sa ilang trabaho kay gilauman niya ang wala’y paglubad nga suporta, commitment ug kooperasyon sa liderato sa PRO-7.
“I accept this post with great expectation that you will give me the same cooperation and support that you have given to the very dynamic outgoing Regional Director Police Brigadier General Roderick Augustus Alba so that this Police Regional Office will keep achieving its goals and objectives”, ni Bearis pa.
Si Alba madestino sa Directorate for Human Resource Development Division sa Camp Crame samtang si Bearis gikan kini sa Police Regional Office-3. (
