Mag-ingat sa Omicron variant (Latest Sabong News)
Author
Bening Batuigas
Date
JANUARY 01 2022
Huwag ninyong ipambili ng alak at isugal ang ayudang ipinagkaloob sa inyo,” ito ang sinabi ni Pres. Rodrigo Duterte sa mga nakatanggap ng P1,000 cash assistance sa mga sinalanta ng Bagyong Odette. Babalikan daw ni Duterte at susuntukin kapag napatunayang winaldas sa alak at sugal ang halagang ipinagkaloob niya nang dumalaw sa lalawigan ng Negros.
May katwiran naman si Digong na magalit sa mga pasaway dahil ang halagang kanyang nalikom ay mula sa kinalap niyang savings ng pamahalaan kaya dapat lamang na pahalagahan.
Noong 2020 na tumama ang COVID-19 sa bansa, nakarating ang balita kay Digong na ipinampusta sa sabong at ipinambili lang ng droga ng mga iresponsableng beneficiaries ang ayudang ipinagkaloob ng pamahalaan kaya nagkanda-gutom ang mga pamilyang binigyan ng ayuda. Sa panahon ngayon na tumaas ang lahat ng bilihin dahil sa paghagupit ni Bagyong Odette, nararapat lamang na gamitin sa pagbili ng pagkain at kung may sobra ay ibili ng pako para sa mga nasirang bahay. Dapat masinop ang lahat sa katiting na halagang ipinagkaloob ng pamahalaan.
Samantala, nakababahala na ang pagtaas ng kaso ng COVID-19. Paalala ng OCTA Research Group na doblehin ang pag-iingat at huwag manatili sa mga matataong lugar lalo na ngayong apat na ang nagpositibo sa Omicron variant. Mas mabilis makakahawa ang Omicon kumpara sa Delta variant. Kapag nagbalewala ang publiko, lolobo umano sa 8,000 ang kaso kada araw bago sumapit ang Enero 15.
Kapag nangyari ito, tiyak na aapaw na naman ang mga ospital sa rami ng pasyente. Ang mahirap ay kapos na ang pondo ng pamahalaan para ayudahan ang mga Pinoy. Maging ang World Health Organization (WHO) ay nagpahayag na nangangamba na sila sa paglaganap ng Omicron variant. Kaya dapat lamang na mag-ingat ang lahat para hindi dapuan ng virus.
Sa mga wala pang bakuna, magpabakuna na kayo para makaiwas sa COVID-19. Napakaraming bakuna. Over supply na umano kaya huwag nang mag-urung-sulong pa. Magtungo na sa vaccination centers.
Happy New Year sa lahat!
