Pag-atake ni Atong Ang kay BBM, fake news? (Latest Sabong News)
Author
Non Alquitran
Date
JANUARY 03 2022
NASA warpath na naman ang negosyanteng si Charlie “Atong” Ang at wala namang ibang pinagdiskitahan kundi ang gambling lord na mahigpit n’yang karibal sa trabaho. Naglabas ng galit si Ang matapos lumabas sa social media ang isang post na umano’y sinabi n’ya na: “Mas may tsansa ka pang manalo sa online sabong kesa itaya mo ang kinabukasan mo kay Bongbong Marcos. Pinagloloko lang kayo ng BBM na ‘yan!” May nakatabi pang litrato ni Ang ang post na mabilis nag-viral.
Ayon kay Ang, fake news ito at itinuturo n’ya ang karibal n’ya sa negosyo na may pakana nito. Araguuyyyyy! Ang nakalagay sa post ay sinabi raw ng karibal n’ya sa mga alipores nito noong nakaraang nag-meeting sila, ani Ang. May spy pala si Ang sa kampo ng kalaban n’ya kaya’t arok n’ya ang mga galaw nito. Mismooooo! Hihihi! Kelangan pa bang i-memorize ‘yan?
Kung totoo itong akusasyon ni Ang, aba magaling din ang utak nitong karibal n’ya sa negosyo dahil isinabong n’ya ang una kay BBM, na tumatakbo sa pagka-presidente. Arok n’yo naman mga kosa na itong si BBM ay malaki ang agwat sa mga katunggali kahit sa anong naglalabasang survey, di ba kosang Johnny Magalona Sir? Maaring may suspetsa si gambling lord na itong si Ang ay suportado si Manila Mayor Francisco Domagoso kaya kapag isinabong niya ang una kay BBM, aba may kahinatnan s’ya kapag naging presidente ito. Get’s n’yo mga kosa? Hihihi!
Kaya may katwirang magalit si Ang dahil kapag naupo na si BBM baka ipasara ang negosyo n’yang online sabong at e-sabong at tiyak pagtatawanan siya ng karibal niya, di ba mga kosa? Mismooooo! Dipugaaaaa!
Kaya sa sobrang galit niya, hinamon ni Ang ang karibal na tumigil na sa kanyang kahibangan at tumingin nang diretso sa kanya. “Di ka ba titigil? Muntik ka na ngang mamatay eh. Ultimo bayan mo, wala nang tumataya sa mga illegal gambling mo kung hindi yang bayan mo na takot na takot na sa iyo,” ani Ang, patungkol sa karibal sa negosyo. “Pinapapatay mo mga tao dyanpag di kayo iboboto. Hindi ka ba naawa sa mga tao?” ang tanong pa niya.
Ayon kay Ang, bilyun-bilyon na ang pera ng gambling lord subalit hindi ito nagbabayad ng tax. Ano ba ‘yan? Dapat sigurong imbestigahan ito ng BIR, ano mga kosa? Hindi lang ‘yan! Pati raw sa PAGCOR, hulugan kung magbayad ang karibal niya. Hihihi! Naging personalan na itong away nina Ang at gambling lord ah. Dipugaaaaa!
Iginiit ni Ang, na may-ari ng Online Sabong naAA Lucky8 Pitmaster Live, na sa kasalukuyan ay abala sila sa pagtulong sa mga nasalanta ng bagyong Odette kaya lang napuwersa siyang lumutang para sagutin ang kumakalat na fake news. May report na naglabas na ang Pitmaster Foundation ng aabot sa P80 milyon para sa mga probinsiya na nadaanan ni Odette.“Tama na yan. Paskung-pasko eh magpagamot tayo ng tao, tumulong tayo sa tao. Puro ka paninira. Ayaw ka naman lumaban ng harapan,” ani Ang. At ang parting shot ni Ang sa kalaban na gambling lord? “Pag nagkita tayo uli sampal ang aabutin mo sa akin.” Araguuyyyyy! Kilala n’yo ba ang kaaway ni Ang, mga kosa? Abangan!
