PRO-7 Director Alba kalit nga girelibohan (Latest Sabong News)
Author
Decemay P. Padilla
Date
DECEMBER 20 2022
CEBU, Philippines — Girelibuhan sa katungdanan isip Regional Director sa Police Regional Office-7 si Brigadier General Roderick Augustus Alba epektibo kagahapong adlawa Disyembre 19, 2022, adlaw’ng Lunes.
Ang National Headquarters sa Philippine National Police nagpagawas og special orders kagahapon nga nagparelibo sa pipila ka mga opisyales sa PNP sa ilahang kasamtangang gihuptang katungdanan.
Si Brigadier General Alba gikan sa Police Regional Office-7 gibalhin kini sa Directorate for Human Resource Development Division sa Camp Crame.
Ang mopuli ni Alba isip Regional Director sa PRO-7 mao si Police Brigadier General Jerry Fornaleza Bearis nga gikan sa Police Regional Office (PRO)-3.
Si Bearis gikan sa Philippine National Police Academy (PNPA) class 1993.
Duha ka buwan ra ang paglingkod ni Alba sa PRO-7 nga nagsugod niadtong Oktubre 13, 2022 dihang iyang gihulipan ang miretirong si Retired Police Brigadier General Roque Eduardo Vega.
Walay gibutyag nga rason kun nganong gihulipan sa katungdanan si Alba kinsa aktibo kaayo sa kampanya sa tanang matang sa krimen ug paghatag og ultimatum sa tanang hepe sa kapolisan ubos sa PRO-7 nga mopakita og labok hangtud sa Enero 2023.
Apil sa dagkong kalamposan ubos sa liderato ni Alba ang kampanya batok ilegal nga drugas, ilegal nga armas, pagpapangita sa mga wanted sa balaod ug labaw sa tanan ning bag-o ang kampanya batok sa e-sabong diin daghan kaayo ang nangadakpan.
Dunay nanggawas nga dili pa kompirmadong report nga giingong adunay naligsang impluwensiyadong politiko ang heneral sa pagpangusog niini sa kampanya batok ilegal nga sugal.
