PNP at NBI, bulag sa bagong style ng jueteng sa Metro! (Latest Sabong News)
Author
Non Alquitran
Date
DECEMBER 13 2021
MAY bagong sibol na palaro sa Luzon sa panahon ng pandemya na kinagigiliwan sa ngayon ng mga adik sa sugal. Hindi ito e-sabong o online sabong ng AA Lucky8 Pitmaster Live ni Atong Ang at Sabong Express ni Bong Pineda subalit parehas silang gumagamit ng gadgets sa operations nila. At maliwanag pa sa sikat ng araw na ilegal ang operations nito dahil hindi saklaw ang palaro ng Philippine Charity Sweepstakes Office (PCSO) at Philippine Amusement and Gaming Corporation (PAGCOR).
Ang ibig kong sabihin mga kosa, tulad ng Small Town Lottery (STL) ngCharity Games of Chance Corporation (CGCC) sa Cagayan, wala ding pakinabang ang gobyerno ni President Digong sa palaro na ito. Araguuyyyyy! Hihihi! Porke’t ilang buwan na lang si President Digong sa puwesto, wala nang takot sa kanya ang mga ilegalista. Dipugaaaaa!
Ang palaro na pinatatakbo ng Mega Star Online Gaming Corporation, na ang namamahala ay si alyas Don, ay naka-pattern sa jueteng. Pero kung ang jueteng ay 1-37 o 1-40, itong palaro ng financier na si Leonardo Avejar Jr., ay 1-31 lang at ang winning combination ay kinukuha sa labas ng EZ2 draw ng PCSO. Kung sa PCSO ang taya na piso mananalo ng P400, sa jueteng ni Avejar itinaas ang premyo sa P450 para maengganyo ang mga adik sa sugal na tangkilikin ang palaro niya.
At mula nang magbukas si Avejar noong October, tumataas ang kubransa niya, at ayon kay kosang Al, aabot na ito sa ngayon sa P1 milyon kada araw. Wowwwww! Mabilis maging bilyonaryo si Avejar ah, di ba mga kosa? Ang masarap sa jueteng ni Avejar, wala na siyang binabayarang tax sa gobyerno ni President Digong, eh bokya din siya sa lingguhang payola sa PNP at NBI. Hihihi! Pasasaan ba’t malalaman ka rin ni Ogie Vilangca o Ogie Rodriguez ng NBI at mga tong kolektor ng PNP, di ba mga kosa? Mismooooo! Dipugaaaaa!
Ganito ang sistema ng MegaStar mga kosa kung bakit nahihirapan ang NBI at PNP na mahagip siya. Binibigyan pala ng kompanya ni Don ng celfone ang mga kubrador nila at presto....nakakabit ito sa link ng kompanya. Ang lahat ng taya ay diretso kay Don at kapag nanalo ka, aba ang bayaran ay sa GCash dumadaan. Kapag wala namang nanalo, nagbabayad ang kubrador sa MegaStar sa pamamagitan din ng GCash. Kaya kung ordinaryong pulis o NBI agent ka lang, mahirap talagang alamin ng raket ni Avejar. Tumpak! Dipugaaaaa!
Dahil sa sistemang ito ng jueteng ni Avejar, bumaba ang lingguhang payola ng NBI at PNP dahil halos lahat ng gambling lords sa Metro Manila at kalapit na lugar ay na-recruit na ng MegaStar. Hihihi! Hindi lang ‘yan! Apektado rin ang mga palaro ng PCSO dahil tulad ng e-sabong at online sabong, mas gustuhin pa ng mga adik sa sugal na tumaya rito sa jueteng ni Avejar dahil sa bahay lang sila. ‘Ika nga ligtas ang mga sugarol sa pandemya. Araguuyyyyy! Subalit matapos ang pagbubulgar ng Dipuga sa bagong style na jueteng ni Avejar, tiyak hindi siya tatantanan ng NBI at PNP hanggang magbigay siya ng lingguhang payola. Mismooooo! Hihihi! Kailangan pa bang i-memorize ‘yan? Abangan!
