CCPO nag-monitor batok sa e-sabong (Latest Sabong News)
Author
Decemay P. Padilla
Date
DECEMBER 08 2022
CEBU, Philippines — Ang kapolisan sa Dakbayan sa Subgo nag-monitor sa e-sabong pagpiho kong aduna pa bay nag-operate niini dinhi sa siyudad.
Ang pag-operate sa e-sabong ilegal kini tungod kay wala pa gitugot ang pagbalik sa operasyon niini.
Matud ni Police Colonel Ireneo Dalogdog, city director sa Cebu City Police Office nga nipagawas siya og direktiba sa tanang police station sa CCPO nga mopahigayon og intensive operation batok e-sabong.
Subay niini, niadtong Lunes ang Carbon Police Station (Station 5) nakasikop og walo ka tawo human nasakpan nga nag-monitor og duwa sa e-sabong diha sa Barangay Ermita, Dakbayan sa Sugbo.
Ang mga dinakpan gilla nga sila si Mario Ambi Mabanag, Juden Alcos Tugbong, Michael Dingcong Ramas, John Alonso Palermo, Joel Ramas Rasonable, Cesario Eupe Palermo, Terso Baculpo Esdrilon, ug Esgani Gabison Membrebem.
Nasakmit atol sa maong operasyon ang kwarta nga P2,400 ug usa ka set sa computer nga gigamit isip monitor.
Ang mga suspetsado gipasakaan og kasong kalapasan sa Presidential Decree 1602 (Illegal Gambling) sa Section 6 sa Akta Republika 10175 kun “Cybercrime Prevention Act of 2012”.
Hinuon bisan sa maong hitabo si Dalogdog niklaro nga wala sila'y na-monitor nga adunay establisamento nga nag-operate og e-sabong.
