Paghulhog sa botante (Latest Sabong News)
Author
Atty. Jose Marie N. Poblete
Date
APRIL 14 2022
Nanawagan ang COMELEC sa mga kandidato sa Eleksyon 2022 nga dili lang unta ipamolitika ang pagpanghatag ug ayuda ngadto sa mga lugar nga apektado sa bagyong Agaton kay mahimo kini’ng hinungdan sa ilang diskwalipikasyon. Taphaw kini’ng maong panawagan sa COMELEC. Kay bisan gani ang pagpakita lang sa kandidato samtang nanghatag sa hinabang susama ra man gihapon nga nangampanya. Husto ang panahom nga “ang pagbotar dili katungod kon dili pamaagi aron pag-ila kon kinsa ang politiko nga labing nagmalampuson pag-hulhog sa botante”. Saoonz!
Gibasol ni Presidente Duterte ang iresponsable’ng pagpakatap sa fake news mahitungod sa coronavirus vaccines nga maoy hinungdan ngano nga diyotay ra ang nagpabakuna sa ubang dapit sa nasud tungod kay dali kini’ng tuohan sa uban’g tawo sa walay pagduhaduha. May punto ang presidente. Tinuod nga ang pagpakatap og sayop nga impormasyon usa usab ka matang sa kagaw. Mahulagway ang kadali mokatap sa fake news sa panultihon nga, “Samtang naghigot pa ang Kamatuoran sa liston sa iyang sapatos, ang Bakak mitadlas ug nagbahis na sa tibuok kalibutan”. Fezteleern!
Matud pa sa Department of Agriculture (DA), ang mga migratory birds mahimong potensyal nga tinubdan sa Avian Influenza kon Bird Flu. Mitambag ang DA sa mga tag-iya’g poultry nga magbutang og mga bird proofing, sama sa pagtaod og mga pukot, aron kapugngan ang pagtakod sa bird flu sa ilang hayopan. Lisod pugngan ang mga migratory birds nga mopaduol sa mga manokan. Makapahinumdom sa bata nga naproblema unsaon pagbugaw ang mga manok kon nga nanuktok sa mga tipasi. Mitambag ang amahan nga hadlokon ang mga manok, busa gibugaw pag-usab sa bata ang mga manok dungan sa pag-ingon, “Halak Nok, naay wakwak. Hawa na mo”. Pagkatoytoy!
Malipayon’g gihanduraw ni Maja Salvador ang mga kutay sa kalampusan nga iyang nakab-ot sa molanat na nga 20 anyos niya’ng karera sa showbiz. Tungod niini, mapasalamaton siya sa iyang mga magdadayeg ug mga fans sa ilang padayon nga pagsalig ug suporta. Adunay mga politiko nga mikabat na ug sobra pa gani sa 20 anyos ang pagpangatungdanan. Ang nakalahi lang sa politiko ug sa artista kay ang artista maoy gibayran samtang ang politiko maoy mobayad. Kaniadto ang pagka-politiko naglangkob sa 75% nga abilidad ug 25% nga pagka-artista, apan karon, nabali na kay 75% na ang pagka-artista ug 25% na lang ang abilidad. Kadakong baligho!
Gipaubos sa imbestigasyon ang usa ka polis sa Manila Police District nga giingon’g nangabuso sa iyang asawa human gisita ang pagkagumon sa iyang bana sa e-sabong. Gikasuko sa polis ang pagsita sa iyang asawa sa iyang bisyo nga miresulta sa pagpanagmal. Sama sa uban’g bisyo, wala’y maayong sangputanan sa tawo ang pagkasugarol. Kay ginaingon man nga “Kon magkahanas ang sugarol, nagkalaksot usab ang iyang pagkatawo”. Tinuod usab ang panulitihon nga “Bata nga sugarol, tigulang nga makililimos”. Isip-isip!
