: SMB vs TNT vs GSM (Latest Sabong News)
Author
Nelson Beltran
Date
NOVEMBER 15 2016
Pagkatapos ng isang buwang pahinga, magbubukas ang Philippine Basketball Association ng panibagong season sa Linggo na ang San Miguel Beer pa rin ang solidong paborito dahil sa kanilang super cast na pinamumunuan ni reigning three-time MVP awardee June Mar Fajardo.
Kasama niyang nanatili sa kanilang koponan sina Arwind Santos, Alex Cabagnot, Marcio Lassiter, Chris Ross, Ronald Tubid, Yancy de Ocampo, Gabby Espinas at JayR Reyes – matibay na core group na lalong pinalakas ng pagpasok nina 6-foot-9 Gilas player Arnold Van Opstal at guard RR Garcia.
Pagkatapos ng lahat ng wheelings at dealings nitong offseason, maikokonsidera ang Barangay Ginebra, TNT KaTropa, Rain or Shine at Alaska Milk na mga pinakamabigat na challengers ng San Miguel Beer.
Pagkatapos balasahin ang kanilang support group na kinabibilangan ngayon nina Terrence Romeo at Stanley Pringle, maaaring dark horse ang Globalport.
Mukhang makakagawa na rin ng ingay ang Blackwater matapos masungkit sa nakaraang draft sina Mac Belo at Raphel Banal.
Mahirap pang sabihin ang patutunguhan ng Star, NLEX at Meralco pagkatapos ang mga pagbabagong ginawa nila sa kanilang lineups ngunit mukhang madaling basahin na mananatili sa ilalim ang Mahindra matapos bitiwan ang kanilang mga alas na sina KG Canaleta, Aldrech Ramos at Paolo Taha.
Eto ang forecast ng mga PBA officials sa kanilang salu-salo sa sports media sa official launch ng PBA Season 42 sa Makati Shangri-La kahapon.
Consensus top choice ang San Miguel na susu-bok sungkitin ang ikatlong sunod ang Philippine Cup championship.
Isang koponan lamang ang nakagawa ng ganoong bagay sa buong PBA history. Umukit ng all-Filipino three-peat ang TNT noong 2011-13 sa ilalim ng pamumuno ni coach Chot Reyes (2011 at 2012) at ni coach Norman Black (2013).
Determinado ang TNT na muling magkampeon. Isang testamento ang mabigat na desisyong iupo bilang bagong head coach si Nash Racela kapalit ni Jong Uichico.
Sabi ni team manager Virgil Villavicencio, maganda ang tugon ng koponan kay Racela. Kung makaka-adjust na sa pro play si sophomore pro Moala Tautuaa at tuluyang mahihinog si Troy Rosario, isa sila sa magiging mabigat na balakid ng SMB.
Mataas na morale at key draft recruits naman ang tangan ng Barangay Ginebra sa kanilang pag-asinta sa ikalawang sunod na championship kasunod ang kanilang Governors’ Cup title run.
Sa huli, nakikita ko na ang parating na Philippine Cup na sabong sa pagitan ng SMB, Ginebra at TNT.
