Pukpukan ng mic noon, naalala dahil sa Oscars (Latest Sabong News)
Author
Ed de Leon
Date
APRIL 01 2022
Pati local celebrities dito sa atin at fans, pinag-uusapan ang naganap na pagsampal ni Will Smith kay Chris Rock sa nakaraang Oscars. Ang akademya naman sa US ay nag-meeting ng kanilang Board of Governors para madesisyunan kung ano ang parusang ipapataw kay Will Smith dahil sa kanyang ginawa.
Pagkatapos pala ng sampalang nasaksihan ng buong mundo dahil sa live television at internet streaming, sinabihan na ng mga kinatawan ng akademya si Smith na umalis na, pero tumutol pa iyon. Sinasabing ang parusa kay Smith ay maaaring suspension o ganap na expulsion, na kung mangyayari ay siya nang katapusan ng kanyang pagiging isang actor. Aalisin na siya bilang miyembro ng union at hindi na makakapagtrabaho pa. Iyon naman ay sinasabi ng iba na masyadong mabigat para sa nagawa niyang kasalanan.
Dito sa atin may nangyari na ring ganyan noon pa. Sa isang talk show noon sa telebisyon nina Alfie Lorenzo at Chanda Romero, nagkainitan ang aktres na si Divina Valencia at ang talent manager na si Rey dela Cruz. Nasabi kasi ni Divina na sobra na ang ginagawang bomba pictures noong mga panahong iyon. Mabilis namang sumagot ang talent manager na “hindi ba bomba star ka rin.” Nagalit si Divina nang tawagin siyang bomba star at ipinukpok sa ulo ni Rey dela Cruz ang hawak niyang microphone. Naputol ang show, pumasok ang ilang commercials, at nang magbalik iyon on the air wala na ang mga nag-away, at bagama’t halata mo ang tensiyon sa hosts, itinuloy nila ang show nang hindi na nabanggit ang pukpukan. Ang usapan ay naging mas matindi pagkatapos ng show, at matagal ding pinag-usapan iyon.
Isa pang tumitindi ngayon ang sagutan ay sina Gretchen Barretto at Senador Ronald “Bato” dela Rosa. Inakusahan ni Bato ang aktres ng character assassination, matapos na kuwestiyunin noon ang suot niyang relong Tag Huer na nagkakahalaga umano ng P85K.
Sinabi pa ni Gretchen sa kanyang comments habang pinanonood sa telebisyon ang Senate hearing tungkol sa E-sabong, na ang senador naman ay nagsusugal din. Kumalat iyan matapos na ma-post ang nasabing video sa social media.
Aywan kung anong aksiyon ang gagawin ni Senador Bato sa sinasabi niyang character assassination na ginawa ni Gretchen laban sa kanya. Sinabi niyang “bakit sila lang ba ang may karapatang magkaroon ng relo na P85K?” At tapos sinabi pa niyang hindi siya nagsusugal.
Sumagot naman si Gretchen na “may ebidensiya ako.” Aywan kung hanggang saan aabot ang pagtatalong iyan, pero sana hindi na palakihin dahil ang problema naman ay hindi pagsusugal lamang, kundi ang mga sugarol na nawawala, at pinaghihinalaang pinapatay.
May kausap daw sa telepono ang isang female star, tapos tumaas na ang kanyang boses na halata mong galit. Pagkatapos noon lumabas iyon ng kanyang kuwarto at ang napag-initan naman ay ang kanyang mga kasambahay na minura niya nang walanag kagatul-gatol, at walang dahilan para kagalitan.
“Siguro napikon na naman si ma’am. Kasi ganyan iyan eh. Tuwing umaga inaalam niya kung ano ang sinasabi tungkol sa kanya sa mga diyaryo at sa social media. Basta hindi maganda napipikon kaya asahan mo nang oras na may magawa kang mali, o minsan kahit na wala, makakatikim ka ng sigaw at mura,” sabi raw ng kasambahay.
Iyon pala ang sinasabing dahilan kung bakit napakabilis niyang magpalit ng mga kasambahay dahil wala talagang tumatagal sa ugali niya.
