May respeto sa isa’t isa kaya ‘di naisapubliko magaling na aktor at TV host-actress matagal nang hiwalay (Latest Sabong News)

Matagal nang may kani-kanyang buhay ang isang mag-asawang personalidad pero parang hindi ‘yun naramdaman ng publiko. Open-secret ‘yun sa mundo ng showbiz pero walang gaanong nasusulat tungkol sa kanilang paghihiwalay. Kasi nga ay marespeto sa isa’t isa ang magaling na aktor at ang aktres-TV host, ayaw nilang pagpistahan ang kanilang personal na buhay, kaya matahimik nilang tinanggap ang naging kapalaran ng kanilang pagmamahalan. Meron silang mga anak, may pinagmanahan ang kagandahan at kaguwapuhan ng mga ito, maganda ang kanilang kumbinasyon. Halinhinan silang gumagabay sa kanilang mga anak kahit pa matagal na silang hiwalay. Nu’ng minsan ay napanood namin ang celebrity ring ina ng female personality na ang sabi, “Sabi ko kay ____(pangalan ng aktres), huwag na huwag siyang aalis sa bahay nila. Kapag ginawa niya ‘yun, wala na siyang babalikan pa. Just stay home.” At ganu’n nga ang naganap. Ang aktor ang umalis sa kanilang bahay, nagsarili ito, ang aktres-TV host ang naiwan sa kanilang bahay kasama ang mga anak nila. Kuwento ng isang source, “Kahit hiwalay na sila, nanatili silang magkaibigan. Bihirang mangyari ang ganu’ng set-up, karamihan sa mga naghihiwalay na artista, ang ending, magkaaway sila. Pero iba itong nangyari kina ____at ____(pangalan ng naghiwalay na showbiz couple). They remained friends. Nagrerespetuhan sila, nagtutulong sa paggabay sa mga bata. Napakaganda ng samahan nila,” sumasaludo pang komento ng impormante. Parehong galing sa malaking pamilya ng mga artista ang bumibida sa kuwento, pareho rin silang edukado, kaya wala sa kanilang bokabularyo ang maglantad ng mga baho nila sa publiko lalo na sa social media. Ubos! Nakatagpo ng katapat ang bastos na si DJ Mo Twister. Isa ring bastos ang bibig ang natapatan niya kay Baron Geisler. At kapag parehong may kabastusan ang mga nag-aaway ay para tayong nanonood ng sabong. Matapang lang si Mo Twister sa malayuan. Nasa Amerika kasi siya, hindi umaabot ang mga sapak at suntok sa milya-milyang distansiya, kaya malaya niyang nasasabi ang kanyang gusto. Kung sino ang gustong pagtripan ni Mo Twister ay napakadulas ng kanyang dila sa pagbibitiw ng mga salita. Kahit walang dahilan ay umaatake siya, kahit nga ang babaeng minahal niya nu’n na si Rhian Ramos ay nagawa niyang babuyin sa publiko, si Baron Geisler pa kaya ang hindi? E, away rin ang hanap ni Baron, pareho lang silang nakakaramdam ng kaligayahan sa pakikipag-away, kaya maganda ang kanilang mga patutsadahan, match na match sila sa pagpaparinigan. Hinahamon ng away na pisikal ni Mo Twister si Baron ngayon, tara na raw, upakan na! Nahihibang kaya si Mo? E, bahagya nga lang siyang tumaas sa tangke ng gas, hahamunin niya ang ensayadong si Baron? Umuwi muna kasi bago maghamon. Mas kapani-paniwalang kakasa sa upakan si Mo Twister kung nandito siya. Bakit kasi naghahamon siya nang malayuan? Para silang palengkerang talakan nang talakan. Palitan sila nang palitan nang maaanghang na pa­tutsada, hamunan sila nang hamunan, samantalang alam naman nilang hindi posible ang kanilang pag-uupakan. Pero kumbaga sa boksing ay match na match ang dila ng dalawang ito. Pareho silang walang preno, pareho silang walang modo, away ang kanilang hilig.