E-sabong gipahunong ni Duterte (Latest Sabong News)

CEBU, Philippines — Human gidepensahan ni Presidente Rodrigo Duterte ang online sabong pipila ka buwan na ang milabay, ning bag-o gusto na niya kining ipahunong tungod sa dili maayong pagtulon-an sa komunidad. Kini subay sab sa rekomendasyon ni DILG Secretary Eduardo Año kinsa una nang gimandoan ni Duterte paghimo og imbestigasyon kabahin sa nanga-missing nga 33 ka mga sabungero ug ang epekto sa e-sabong diha sa katilingban. Una niini, si Duterte gihangyo nga ipasira kini nga operasyon apan gidepensahan niya kini tungod sa kadako sa makolektang buhis nga moabot og P640 milyones kada buwan nga ikatapal sa pundong nagamit tungod sa pandemiya sa Covid-19. Apan ning bag-o, nausab ang hunahuna sa presidente. Sa iyang mensahe atol sa "Talk to the People" nga gi-ere niadtong Martes, si Duterte miingon nga iyang gisunod ang rekomendasyon ni Department of the Interior and Local Government (DILG) chief Eduardo Año. Una na nga gimandoan sa presidente Año nga moumol og survey kalabot sa social impact sa e-sabong . "May naririnig na ako, loud and very clear to me, that it was working against...our values and 'yung impact sa pamilya pati sa tao, e ang labas, hindi na natutulog 'yung mga sabungero [for] 24 hours, that was the first objection that I've heard from somebody, I think it was coming from a congressman na sobra ito, "suma pa ni Duterte . Sayo ning semanaha, mihangyo ang Konseho sa kagamhanan sa Siyudad sa Sugbo ngadto sa e-sabong licensing office nga mag-umol og moratorium sa pag-isyu og bag-ong lisensya alang sa e-sabong betting centers. Si Konsehal Raymond Alvin Garcia miduso sa maong hangyo atol sa regular session sa konseho sa miaging adlaw ug giaprobahan kini sa konseho. Si Garcia maoy chairman, Cebu City Game Fowl Commission. Usa ka ginganlan og Edmund Estabello, nga taga Barangay Duljo-Fatima maoy nipadala og suwat kang Garcia nga naghangyo kaniya nga hunongon na ang pag-isyu og permits pag-abli og dugang e-sabong betting centers. Kini tungod kay makadaot kini sa pinansyal nga kahimtang sa daghang mga kabus nga Sugbuanon ug nakasamok usab sa moralidad sa komunidad. Suma pa ni Estabello bisag wala pa gani makabangon tanan sa bagyong Odette ug naa pa gyud sa Alert level 2 ang siyudad tungod sa Covid-19, daghan ng mga tawo ang nangagapos sa online sabong, talpakan o betting centers. Gawas sa mga betting centers, mahimo sab mosugal pinaagi sa cellphone gamit ang e-money transfer apps. Sukad nga gitugotan kini, daw mga uhong ug libgos nga nanurok bisan asang suok sa kabarangayan ang mga betting centers ug mga tapok-tapok sa mga sugarol nga namusta gamit ang cellphone. Nahimong estambayan sa mga tawo, gikan sa mga drayber sa sikad, habal-habal, taxi drivers, mga vendors, ug uban pa nga daginuton sab og pangita. Si Police Lieutenant Colonel Maria Theresa Macatangay, tigpamaba sa Cebu City Police Office niangkon nga nalipay sila sa mando ni Duterte. Apan magpaabot sila og opisyal nga kamandoan aron rondahon ug sirad-an kining mga betting centers. Si Macatangay, nitug-an nga kung palabay ra sa oras ang sabong walay problema, apan tungod kay sugal naman kini karon dili na makaayo sa komunidad. —