7 ka buwangan gitugutan sa Toledo (Latest Sabong News)
Author
Raymond D. Abarcas
Date
JULY 04 2016
CEBU, Philippines - Giaprobahan sa konseho sa Dakbayan sa Toledo ang ordinansa nga nagtugot sa paghatag og lisensiya o permiso sa pag-operate sa pito ka sabongan sa dakbayan.
Kini pinaagi sa pag-amendar sa Ordinance No. 17 series of 1993 sa siyudad nga naghatag og pagtugot sa pag-isyu og lisensya o permiso sa pag-establisar, pag-operate ug pagmentinar og mga buwangan ingon pag-regulate sa sabong.
Lakip niini ang pagkolekta og buhis o bayad sa pagpahigayon og sabong.
Ang maong ordinansa giduso ni Konsehal Antonio "Jun-Jun” Borja nga mao ang kanhi chairman sa committee on games and amusements sa konseho atol sa katapusang regular session sa ika- 9 nga sanggunian.
Nalatid sa maong ordinansa nga legal nga maka-operate ang sabongan sa Barangay Matab-ang, Ilihan, Media Once, Bato, General Climaco (Malubog), Cantabaco ug nadugang ang sabongan sa Barangay Bunga.
