EDITORYAL - Meron pa ring e-sabong (Latest Sabong News)
IPINATIGIL na ni Pres. Rodrigo Duterte ang e-sabong noong nakaraang linggo. Si Deparment of Interior and Local Government (DILG) Secretary Eduardo Año ang inatasan ng presidente na ipatupad ang kautusan. Mabigat ang direktiba ng presidente: hulihin ang mga lalabag. Ang pagpapatigil sa e-sabong ay isinagawa ng presidente matapos niyang marinig ang mga pag-iimbestiga at pag-aaralni Secretary Año. Nalaman ng presidente na maraming nasisirang buhay at kinabukasan dahil sa pagkalulong sa e-sabong. Ayon sa presidente, nawawala ang values sa pamilyang Pilipino dahil sa e-sabong.
Una nang sinabi ng presidente kamakailan na hindi niya maaaring ipatigil ang e-sabong dahil malaki ang kinikita ng pamahalaan sa buwis na galing dito. Ayon sa presidente, P640 milyon bawat buwan ang revenue mula sa e-sabong. Kailangan umano ng pamahalaan ang pondo kaya nakiusap siya sa mga bumabatikos na huwag nang pansinin ang e-sabong.
Pero nagbago ang pananaw ng presidente makaraang magreport si Secretary Año sa kasamaang dulot ng e-sabong. Ayaw niyang madagdagan pa ang mga nasisirang pamilya dahil sa pagkalulong sa sugal na ito.
Maraming natatalo sa e-sabong na umaabot ng milyon. Ang iba ay nagpapakamatay dahil sa kahihiyan. May pulis na nagnanakaw para mabayaran ang pagkakautang sa e-sabong. May babaing nagbebenta ng sariling sanggol para mabayaran ang malaking pagkakautang sa e-sabong. Mayroon ding OFW na walang naiuwing pera sa pamilya dahil natalo sa e-sabong.
Magandang desisyon ang ginawa ng presidente na pagpapatigil sa e-sabong. Ang problema ngayon, marami umanong nagpapatuloy sa operation ng e-sabong. Patuloy umano ang e-sabong sa Nueva Ecija, Cavite, Batangas. Rizalat sa Visayas. Nararapat kumilos si Secretary Año at ganundin si PNP OIC Lt. Gen. Vicente Danao para arestuhin ang mga lumalabag. Huwag hayaang mamamayagpag ang sugal na sumisira sa kinabukasan ng mga Pilipino lalo ang mga kabataan. Nararapat bantayan ang mga mag-o-operate ng e-sabong.
