Higit 50K dialysis patients, apektado sa pagsara ng e-sabong (Latest Sabong News)
Author
Mer Layson
Date
MAY 09 2022
MANILA, Philippines — Apektado ang nasa mahigit sa 50,000 dialysis patients na tinutulungan ng Pitmaster Foundation dahil sa pagsasara ng operasyon ng e-sabong sa bansa.
Ayon kay Atty. Caroline Cruz, director ng Pitmaster Foundation, kinukuha nila ang kanilang pondo sa Pitmaster Live na pinangtutustos o pinangtutulong sa pagpapa-dialysis sa mga pasyente na lumalapit sa kanila.
Humihingi ng paumanhin si Cruz sa mga bagong lumalapit sa kanila na pansamantalang tigil muna ang kanilang pagtulong habang inaayos pa ng pamahalaan ang mga regulasyon at alituntunin sa e-sabong.
Tiniyak naman ni Cruz na babayaran ang lahat ng mga medical institutions at facilities na nilapitan ng mga pasyente ng Pitmaster Foundation para magpagamot bago ipasara ang nasabing laro.
Sinabi ni Cruz, mahigpit ang utos ng kanilang Chairman na si Charlie “Atong” Ang na bayaran agad ang mga ospital at dialysis center na tumanggap ng letter of guarantee nitong mga nagdaang linggo.
Ayon pa kay Atty. Cruz sa mga napangakuan ng Pitmaster Foundation na mga pasyente na tutulungan at mga local government units na napangakuan nila na bibigyan ng ambulansya ay itutuloy pa rin.
