‘Duterte’ gidakop sa kaso’ng pagpatay (Latest Sabong News)
Author
Jojo C. Ugdol/GMR
Date
DECEMBER 02 2015
CEBU, Philippines - Nadakpan na ang suspek sa pagpatay sa usa ka polis sa Dakbayan sa Carcar alas 2 pasado sa hapon niadto’ng Domingo sa Sudlon I, Dakbayan sa Sugbo.
Ang suspek giila nga si Andoy Duterte, hingkod, ug usa sa tulo nga gitumbok nga nipatay kang PO1 Felicisimo Unabia niadto’ng Disyembre 1, 2013 pasado alas 8 sa buntag sa Poblacion, Dakbayan sa Carcar.
Nasikop si Duterte sa mga sakop sa Regional Special Operations Group-7 samtang kini nalingaw og tan-aw sa sabong sa manok.
Matud ni Supt. Rex Derilo, hepe sa RSOG-7, nga nakadawat sila og impormasyon kabahin sa presensiya ni Duterte hinungdan nga dali nila’ng girespondehan bitbit ang warrant of arrest nga giisyu ni Judge Ma. Lynna Adviento.
Nakurat na lang ang suspek diha’ng gilibutan na sa mga sakop sa RSOG-7 ug wala na nakahigayon sa pagsibat.
Gawas kang Duterte, una na nga nadakpan sa kapolisan sila si Marvin Binoya, 31, ug Juanito Linggatong, 38, niadto’ng nakalabay nga tuig.
Si Duterte ang gikataho’ng nipusil sa polis samtang si Binoya ang nagmaneho sa motorsiklo nga ila’ng gisakyan ug si Linggatong ang nagsilbi’ng lookout.
Sa pagpakighinabi sa mga tigbalita ni Duterte, kini hugtanon nga nilimod sa pasangil kay atol sa hitabo didto daw siya sa iya’ng umahan.
“Makuha diay ko’s CCTV (closed circuit television camera) nga wa man ko diha? Nangguna ra ko sa amoa ana, kuyog ko’s ako’ng pamilya,” pasabot ni Duterte.
Apan bisan sa iya’ng paglimod, kombinsido ang pamilya sa namatay nga polis nga siya ang nipatay niini human kini nakuhaan ug nakita sa video sa CCTV.
Gipatay si Unabia sa Poblacion, Carcar samtang nagpaabot og masakyan paingon sa Dakbayan sa Sugbo.
Ang polis paingon na unta sa iya’ng trabaho isip sakop sa Mobile Patrol Group (MPG) sa Cebu City Police Office (CCPO).
