Curfew sa Toledo gisayohan ang oras (Latest Sabong News)
Author
Rowena D. Capistrano
Date
SEPTEMBER 16 2020
CEBU, Philippines — Ang Dakbayan sa Toledo mopahigayon og curfew sugod sa alas 9:00 sa gabii imbes sa alas 10:00 sa gabii hangtud sa alas 5:00 sa kadlawon diin tumong niini nga mapugngan ang pagkuyanap sa kaso sa COVID-19.
Si Mayor Marjorie Perales niluwat sa Executive Order No.70 alang sa bag-ong palisiya nga ipatuman sugod sa adlaw nga Biyernes, Septiyembre 18, 2020.
Ang ipatuman nga curfew sa siyudad magsugod sa alas 9:00 sa gabii hangtud sa alas 5:00 sa kadlawon alang sa mga non-workers ug non-exempt workers.
Lakip sa maong executive order gidili ang tanang sugal sa siyudad lakip ang sabong ug uban pa.
Ang mga community activity ug pista ang dili usab tugotan, gidili usab ang pag-inom-inom sa gawas sa panimalay ug sa mga pampubliko nga lugar.
Tumong usab sa maong kamandoan nga mapugngan ang katawhan ilabi na ang mga kabatan-onan nga magawas-gawas sa ilang mga balay ug magsuroy-suroy diha sa ilang lugar. (BANAT NEWS)
