E-sabong hinto na! - Duterte (Latest Sabong News)
Author
Malou Escudero
Date
MAY 04 2022
MANILA, Philippines — Ipinatigil na ni Pangulong Rodrigo Duterte ang operasyon ng online sabong o e-sabong dahil hindi umano ito naaayon sa “values” ng mga Filipino.
Ayon kay Duterte, mismong ang Department of Interior and Local Government (DILG) ang nagrekomenda na ipatigil ang e-sabong dahil sa napakaraming negatibong idinudulot sa buhay ng mga Filipino.
Sinabi rin ng Pangulo na ginawa ng DILG ang trabaho nito at tiningnan ang mga problemang nag-uugat sa e-sabong.
Maliwanag aniya na ang e-sabong ay may negatibong impact sa mga mamamayan, sa pamilya at sa mismong mga sabungero.
“So ginawa ni secretary ‘yung trabaho niya and he reported, validated ‘yung naririnig ko... May naririnig na ako loud and very clear to me -- it is working against our values. ‘Yung impact sa pamilya at sa tao, ang labas, hindi na natutulog ‘yung mga sabungero 24 hours,” ani Duterte.
Naging kontrobersiyal ang e-sabong dahil sa 34 sabungero na nawawala at hindi na nakita ng kanilang mga kamag-anak.
Sa isang talumpati noong Linggo, inihayag ni Duterte na posibleng sinunog na ang mga nawawalang sabungero at posibleng sangkot pa ang ilang tiwaling pulis.
Nauna na ring sinabi ni Duterte na bagaman at aabot sa P640 milyon kada buwan o halos bilyon-bilyong piso kada taon ang kikitain ng e-sabong, pag-aaralan niya itong mabuti dahil sa maraming social problems na idinudulot ng nasabing sugal.
