Laing sugal nga gipaagi sa online gibantayan sa kapolisan (Latest Sabong News)
Author
Decemay P. Padilla
Date
SEPTEMBER 23 2022
CEBU, Philippines — Laing matang sa sugal nga gipaagi og online ang gi-monitor sa kapulisan sa siyudad sa Sugbo gani ila na kini nga gipadangat sa legal department sa Philippine National Police(PNP) alang sa tukma nilang lakang.
Giangkon ni Cebu City Police Office Deputy City Director for Administration Lt. Col. Wilbert Parilla nga dakung hagit nila kun kinsa ang mga nagpaluyo sa maong matang sa sugal kay electronic ang paghimo niini ug dili mahibaw-an asa dapita naggikan.
Nagkanayon si Parilla nga dihang nawala ang e-sabong daghang nanggawas nga online gambling, ug gisusi na sa ilang intelligence unit ang mga tahu nga ilang nadawat.
“Tong-its, the same murag naay banker, unya naa kay mga kaduwa nga murag online ramo, magpustahanay mo, I don’t know unsaon na niya pagkakuan kay naa koy nahibaw-an nga online magduwa sila og tong-it wala nay physical nga duwa”, suma ni Lt. Col. Parilla.
Gipasabot ni Parilla nga kun ang usa ka indibidwal maboang sa sugal apektado gyud ang tanan kay magsige na og sugal ug wala nay tarong nga mabuhat.
Samtang sa Probinsiya sa Sugbo, ang Cebu Police Provincial Office (CPPO) mas mihingusog pa sa ilahang kampanya batok sa illegal nga sugal.
Base sa ilang datos gikan sa September 1 hangtud karon mokabat na sa 180 ka operasyon ang ilang nahimo.
Sa maong operasyon 341 ka indibidwal ang nadakpan nga nalambigit sa illegal gambling ug dul-an sa 50 mil pesos ang nasakmit nga pusta.
Suma sa Deputy Provincial Director for Operations sa Cebu Police Provincial Office Lt. Col. Mark Gifter Sucalit sa 180 ka operasyon , 63 niini ang may labot sa swertres, 33 ang hantak, 32 ang card games, 13 ang mahjong, 21 sabong ug 17 ang ubang klase sa sugal. Giklaro hinoon sa kapulisan nga dunay legal nga Small Time Lottery sa Cebu Province nga nag-operate sama sa ubang lugar sa Rehiyon Siete nga mao ra gyud ang gitugutan nga mag-operate.
Gipahinumduman sab ni Lt. Col. Sucalit ang kapolisan nga dili gyud mosugal ilabi na sa online kay kun masakpan sila posible nga mapasakaan sila og kaso o kaha mataktak sa serbisyo. —
