Mga sabungerong mangtiyope ang delihensiya, dinedo nga ba? (Latest Sabong News)
Author
Kokoy Alano
Date
FEBRUARY 02 2022
UMALINGAWNGAW ang mga balita tungkol sa 10 nawawalang handlers ng mga manok na panlaban sa derby at pinaniniwalaang dinukot dahil sa game fixing o paniniyope sa laban. Noon pa man, marami na ang gumagawa ng ganitong pangtitiyope sa mga sabungan na pinipilayan ang pakpak ng manok bago bitawan at ang mananari naman ay binabaluktot ang ikinakabit na tari para hindi makasugat. Matotokhang talaga kapag nabisto!
Kung totoo ang suspetsa, aba ay talagang puwede ngang madisgrasya ang gumagawa ng ganito, dahil tinraydor na ang financier, pinerwisyo pa pati ang manok at mistulang ninanakawan nang harapan ang mga namumusta sa laban sa loob ng sabungan. Sumalangit nawa sila, para makasabong nila si San Pedro, he-he-he!
Halos tinagurian nang pambansang sugal ang sabong sa bansa natin kaya kasalanang mortal sa mga kapwa sabungero ang ganitong gawain. Sa pagpapalahi pa lamang ng manok ay malaking pera na ang kailangan. Mula sa pagpapasisiw hanggang sa maging tandang na panlaban, aba, libong halaga na ng patuka at pasuweldo ang gastos. Tapos, peperwisyuhin lang ng handlers? Aba’y may paglalagyan nga!
Ang pustahan sa sabong ay idinadaan lamang sa maginoong senyasan at kumpas ng daliri pero nagkakabayaran nang maayos pagkatapos ng laban, kaya ang bansag sa sabong ay “Juego de Caballeros”, kaya ‘yung mga mandaraya at sumasalisi ng takbo kapag ang manok na pinustahan ay namemiligro nang matalo, didiretso talaga sila sa sementeryo kapag nasakote ng mga sabungerong talunan. Totoo ‘yan!
Maging leksyon na rin sana ito sa mga nabubuhay pang handlers at mananari na nagpaplanong umulit pa ng pambabalahura. Aba eh maghunos dili na kayo, sayang ang buhay ng mga manok, ha-ha-ha!
