E-sabong sa Mingla, gironda (Latest Sabong News)
Duha ka negosyante, lakip na ang ilang mga kawani, gidakop sa National Bureau of Investigation (NBI-7) gumikan sa matod pa illegal nga operasyon sa E-sabong nga nahimutang sa Barangay Calajoan, lungsod sa Minglanilla niadtong Septiyembre 16, 2022.
Ang duha ka dinakpang giingong operators giila nga sila si Carlos Uy Gothong III, alyas Jun Gothong, ug Sergio Santos Lu, alyas Dongdong Ong, nga maoy tag-iya sa ‘The Amenic N’ Calajoan Cockpit.’
Base sa talaan sa NBI nga lakip nga gidakop ang 39 ka mga empleyado sa maong E-sabong.
Nasayran nga sigun sa gipadala nga certification sa Philippine Amusement and Gaming Corporation (Pagcor) nga way permit to operate ang naasoyng sabongan.
Atol sa pagronda, nakuha sa NBI ang P2.6 milyones nga cash, mga gamit sa maong pasugalan sama sa video equipment, computers ug uban pa nga gibana-bana nga mobalor ngadto sa P2 milyones.
Ang mga suspek gipasakaan og kasong may kalapasan sa Section 1 sa Presidential Decree (PD) 1602 nga may kalabutan sa Sec. 6 sa Republic Act 10175 o ang Cybercrime Prevention Act of 2012.
Ingon man ang kalapasan sa PD 449 (Cockfighting Law of 1974) may labot sa Art. 8 sa Revised Penal Code.
Ang mga nasikop gipaubos na sa inquest proceedings sa Cebu Provincial Prosecutor’s Office niadtong Septiyembre 19, 2022.
Ang piskaliya nirekomindar og P72,000 nga piyansa alang sa tanang dinakpan.
