Nasikop sa tigbakayan gihimong ‘surrenderers’ (Latest Sabong News)
Author
Jojo C. Ugdol
Date
DECEMBER 28 2016
CEBU, Philippines - Nidangop sa Police Regional Office -7 ang usa ka opisyal sa gobiyerno aron pagreklamo sa mga sakop sa Minglanilla Police Station nga gikatahong nisikop sa mga tawo nga naghimo og sabong sa manok apan gipanghimong drug surrenderers.
Si Roger de Dios, regional director sa Department of Environment and Natural Resources-CARAGA ubos sa Mines and Geosciences Bureau, ang personal nga nakig-estorya ni Senior Supt. Rey Lyndon Lawas, deputy regional director for operations sa PRO-7.
Ang insidente nahitabo niadtong Disyembre 25 sulod sa sabongan sa Upper Linao, Minglanilla pasado alas 4 sa hapon atbang sa balay ni de Dios diin nadala sa pagsikop ang iyang anak.
Sa operasyon nga gihimo, nasikop ang halos 80 ka tawo kauban ang anak ni de Dios nga si Revo, 30-anyos, kinsa adunay gamay nga tindahan sa softfrinks, candies ug mga pagkaon sa sabongan.
Si Lawas niingon nga iyang tagbuon karong hapon ang mga reklamante ug ang mga polis nga nihimo sa operasyon.
Nagtuo si de Dios nga wala nasubay sa saktong proseso ang raid kay walay representante gikan sa barangay, media ug gisikop ang tanan nga anaa sa dapit.
Si de Dios nipasangil nga ang maong operasyon gihimo aron maabot ang kota sa Oplan Tokhang ug gipapirma og blangko nga papel ang mga nadakpan.
Gani dunay ebidensya si de Dios nga recorded nga panag-estoryahanay tali sa polis ug sa anak niya.
“Way kaso, kota daw. Kota para surrenderees. Ang nahitabo didto tanan, way napaylan nga illegal gambling. Gipapirma ra silang tanan nga drug user. Gikodakan sila nga murag mga kriminal. Wa sila tagai og kopya. So, ang proseso, dili gyud maayo. Ato, han-ay ang proseso di kay papirmahon ninyo’g kuan diha nga user siya, kung pananglitan naa nay kontra, pusilon ug kung planteran, makakuan pa ka?” matud ni de Dios.
Si Lawas niingon nga kung mopasaka gyud og kaso ang director ila kini nga tabangan ug mohimo sila og imbestigasyon.
Kung mapamatud-an ang pasangil batok sa mga polis, si Lawas niingon nga mag-atubang gyud og tukmang silot ang mga gipangreklamo.
