Kapalaran ng e-sabong ipinauubaya ng DOJ sa Kongreso (Latest Sabong News)
Author
Malou Escudero
Date
APRIL 01 2022
MANILA, Philippines — Ipinauubaya ng Department of Justice (DOJ) sa Kongreso ang kapalaran ng e-sabong o online sabong.
Ayon kay Justice Secretary Menardo Guevarra, nasa kapasyahan ng mga mambabatas kung ano ang dapat gawin sa e-sabong.
Ipinagtanggol din ni Guevarra ang kapasyahan ng Philippine Amusement and Gaming Corporation (PAGCOR) na i-regulate ang “e-sabong.”
“Kung ang Kongreso ay tingin nila ay kailangan ng legislative franchise na hindi sufficient na PAGCOR lamang ang mag-i-impose ng rules and regulations then so be it,” ani Guevarra.
Nasa kapasyahan din aniya ng mga mambabatas kung idedeklarang ilegal ang e-sabong.
“If Congress also believes that ‘e-sabong’ should be outlawed at i-declare na labag sa batas ay nasa kanila rin iyon,” ani Guevarra.
Pero kung hindi aniya gagalaw ang Kongreso sa ngayon ay kakailanganin kumilos ang executive department.
Idinagdag ni Guevarra na nagpalabas na ng legal opinion ang DOJ at Office of the Solicitor General (OSG) na nagsasabing sakop ng kapangyarihan ng PAGCOR ang pag-regulate sa “e-sabong.”
“Yun naman ay nakasaad din doon sa kanilang charter although hindi naman na-mention yung ‘e-sabong’ dahil ngayon lang naman yang ‘e-sabong’ nauso e dati naman wala ‘yan,” ani Guevarra. Tiniyak din ni Guevarra na patuloy ang imbestigasyon ng National Bureau of Investigation (NBI) sa mga nawawalang sabungero.
