Ahente ng E-sabong, dinukot ng mga pulis (Latest Sabong News)
Author
Gemma Garcia
Date
MARCH 22 2022
MANILA, Philippines — Mga pulis ang kumidnap sa isang e-sabong master agent sa kanyang bahay sa Laguna.
Ito ang kinumpirma sa Senado ni Criminal Investigation and Detection Group (CIDG) Director Eliseo Cruz sa ikatlong pagdinig ng Senate public order committee.
Sinabi ni Cruz na tinitipon na ng mga imbestigador ang sinumpaang salaysay ng mga testigo at iba pang ebidensya bilang paghahanda sa paghahain ng kaso laban sa mga suspek.
Ginawa ni Cruz ang pahayag sa komite matapos magkaroon ng bagong kaganapan sa isa sa walong kasong hinahawakan ng CIDG kaugnay ng pagkawala ng 34 sabungero.
Itinuro ng apat na testigo ang limang suspek mula sa 28 litratong ipinakita sa kanila ng mga otoridad na posibleng dumukot kay Ricardo Laso ng tinatayang mahigit sa 10 armadong lalaki sa kanilang tirahan sa San Pablo Laguna noong Agosto 30, 2021.
Ang mga pulis ay dating nakatalaga sa provincial intelligence ng Laguna police provincial office na nakabase sa Sta. Cruz, Laguna.
Inihahanda na rin umano nila ang kaukulang kaso sa Department of Justice laban sa limang pulis.
