Ihinto ang POGO (Latest Sabong News)
Author
Bening Batuigas
Date
SEPTEMBER 20 2022
PINANGASIWAAN ni DILG secretary Benjamin Abalos ang pagpasara ng isang kompanya ng Philippine offshore and gaming operators (POGO) sa Angeles, Pampanga. Lumalabas na 40 Chinese ang pinahihirapan at gutom na gutom matapos ikulong ng sindikato na mga Chinese rin ang utak.
Sa Cainta, Rizal, 100 banyaga na kinabibilangan ng 70 Chinese, 44 Pinoy, 16 Vietnamese, 2 Taiwanese, 1 Malaysian, at nakapagtataka, mayroon ding 44 Pinoys ang na-rescue ng NBI. Ang sindikato ay pinamumunuan ng Chinese national. Ang mga na-rescue ay may mga pasa at paso sa katawan.
Kaya kumilos na si Justice secretary Jesus Crispin Remulla para repasuhin ang mga permiso at prebelihiyo ng mga dayuhang nagtatrabaho sa POGO. Ayon kay Remulla, mahigit sa 18,000 dayuhan ang nakapasok sa bansa mula nang bigyan ng permiso ng Pagcor ang POGO. Maging si Finance Sec. Benjamin Diokno ay nagpahayag na karampot na lamang ang napupunta sa pamahalaan sa kinikita ng POGO. Mula sa inaasahang P7 bilyon ay P3.5 bilyon na lamang ang nakukolekta sa POGO.
Kaya sinabi ni Senate Minority Leader Aquilino Pimentel III na palayasin na ang POGO dahil nakakaladkad ang bansa sa pagiging killing ground ng mga dayuhan. Sabi naman ni Senator Imee Marcos, kung hindi raw kayang i-regulate gaya ng e-sabong, itigil na ang POGO. Ang kinikita raw ay napakaliit at malaki pa ang ang kinikita under the table.
Dapat ihinto na ang POGO para mabawasan ang krimen sa bansa. Wala nang ginawa ang NBI at PNP kundi i-rescue ang mga Chinese na kinikidnap. Sa mga Chinese naka-pokus ang mga awtoridad sa halip na sa mga kababayan.
