Sindikato, nasa likod ng 31 ‘missing’ sabungero? (Latest Sabong News)
Author
Mer Layson
Date
FEBRUARY 28 2022
MANILA, Philippines — Isang sindikato umano ng mga financiers ang tinitingnang anggulo ngayon ng Philippine National Police (PNP) hinggil sa mga nawawalang sabungero matapos tumestigo ang isang ginang sa Senate inquiry noong nakaraang linggo.
Ayon kay Geralyn Magbanua, asawa ng nawawalang sabungero na si Manny Magbanua, naniniwala siya na may kinalaman ang may-ari ng breeding farm ng mga manok na panabong sa Tanay, Rizal sa pagkawala ng kanyang mister at isa pang kasamahan.
Ani Geralyn kay Senate Committee on Peace and Order and Dangerous Drugs Chairman Sen. Ronald “Bato” Dela Rosa, ilang linggo pa lang nagtatrabaho bilang “handler” ng mga manok ni Julius Javillo ang mister niya.
Gabi ng January 12, 2022 ng ipasundo umano ni Javillo ang mister na si Manny para bumitaw ng manok ng amo sa sabong kinabukasan sa Sta. Cruz, Laguna.
Nang tanungin ni Sen. Dela Rosa si Aling Geralyn, “ honest opinion mo, tingin mo ba siya ang sa likuran ng pagkawala ng asawa mo at mga kasamahan niya”?
“Tingin ko po parang siya (Javillo)…kasi siya po ang financier at amo na nag-aano sa mga tauhan”, ang tugon ni Geralyn.
Batay sa kwento ng ginang kasama ng mister niya si Marvin Flores, na tauhan din ni Javillo, na nawawala rin hanggang ngayon. Hindi raw sumama si Javillo sa Sta. Cruz, Laguna ng mawala ang dalawa pero ayon sa mga otoridad hindi na rin nila matagpuan ang financier na posibleng nagtatago lang.
Ayon sa isang imbestigador ng PNP-CIDG, isa nga sa tinitignan nilang anggulo sa pagkawala ng 31 na sabungero ay isang malaking sindikato na sangkot sa “panto-tyope sa online sabong na posibleng inonse naman ng mga nawawalang mga tao”.
Ayaw pang magbigay ng komento ng PNP hinggil sa nasabing anggulo at pahayag ni Ginang Magbanua.
