POGO crimes nagpapailap sa investors (Latest Sabong News)
Author
Doris Franche-Borja
Date
SEPTEMBER 19 2022
MANILA, Philippines — Nanawagan si House Committee on Appropriations Vice Chairman at Iloilo Rep. Janette Garin sa Senado at sa mga kapwa mambabatas nito sa House of Representatives na gumawa ng hakbang para ma-ban na sa bansa ang Philippine Offshore Gaming Operations (POGO) kasunud na rin ng mga insidente ng kidnapping, pagdukot at iba pang illegal na aktibidad na kinasasangkutan ng mga Chinese nationals.
Ayon kay Garin ang ganitong mga insidente ay may matinding epekto sa imahe ng Pilipinas sa international community at siyang dahilan para umiwas ang mga foreign investors.
“Now that we are opening up our economy and kidnapping and human trafficking headlining our daily news, it is driving away investors considering that its creating a misinformation that the Philippines is not safe,” pahayag ni Garin kung saan tinukoy nito ang naging operasyon kamakailan ng Philippine National Police Anti-Kidnapping Group kung saan 42 Chinese nationals sa Angeles City, Pampanga na biktima ng human trafficking ang nasagip.
Ipinagmamalaki ng Philippine Amusement and Gaming Corporation (PAGCOR) ang malaking revenue na nakukuha sa POGO na siyang unang dahilan kung bakit hindi ito dapat na ipahinto gayunpaman para kay Garin hindi sapat ang kita kung kapalit naman ay mga krimen na nakasisisira sa bansa.
Sinuportahan ni Garin ang nauna nang pahayag ni Finance Secretary Benjamin Diokno na pumapabor din sa pagpapahinto ng operasyon ng POGO dahil na rin sa masamang reputasyon na dinudulot nito.
Samantala, sinabi ni Senador Imee Marcos na nakausap niya ang kapatid niyang si Pangulong Marcos nang magtungo siya sa palasyo para dumalo ng kaarawan nito na kung saan ay pinag-iisipan na umano nito ang pagpapasara sa POGO sa bansa.
Iginiit umano ng Senador sa pangulo na kung hindi kayang ipatupad ang task force na tututok sa mga illegal na aktibidad ng POGO na mukha umanong hindi talaga dahil ilang taon na ang kaguluhan na ito ay dapat tigilan na lamang.
Sinabi umano ito ni Marcos dahil alam naman niya na ayaw talaga ito ng presidente tulad ng pag ayaw sa e-sabong na kikita, subalit maliit lamang ito at hindi sapat ang halaga para sa krimen tulad ng kidnapping, abduction at iba pa.-
