Guidelines sa pagbukas sa buwangan gipagawas na (Latest Sabong News)
Author
Rowena D. Capistrano
Date
MARCH 25 2022
CEBU, Philippines — Nipagawas na og guidelines ang Emergency Operations Center alang sa pagbukas ug balik sa mga tigbakayan nga gihangop ug gikalipay sa mga nagdumala ug trabahante sa mga cockpit arena.
Ang EOC nipagawas niini nga girekomendar ni Konsehal Joel Garganera, Deputy Chief Implementer sa EOC ug giduso kini ngadto kang Mayor Michael Rama.
Base sa guidelines kinahanglan nga bakunado ang tanan empleyado sa cockpit ug fully vaccinated, kinahanglan ang higpit nga pagtuman sa minimum public health standard sama sa pagsul-ob ug facemask, social distancing ug uban pa.
Kinahanglan usab tanang trabahante magdala ug facemask o kaha panapton nga magtabon sa ilang mga nawong hangtud magpadayon pa ang duwa.
Giawhag usab ang mga cockpit arena nga adunay tukma nga ventilation, ug naay gidestino nga Health Infection and Prevention Control Officer.
Ipabilin usab ang handwashing ug sanitation stations alang sa mga mosulod sa arena nga ipahumutang sa mga strategic nga lugar.
Aron kalikayan ang transmission sa arena, kinahanglan usab dili overcrowded ang maong lugar, ug regular ang paglimpyo ug disinfection matag human sa cockpit operations. Ang EOC nipahinumdum sa mga nagduma og cockpit arena nga sa dili pa sila hingpit nga mobukas pagbalik kinahanglan usa kini susihon pagbalik uban sa nagkadaiyang ahensya kung nisunod ba kini sa rekisitos.
Ang maong kalambuan gihangop sa mga nagdumala sa arena tungod kay dako na unya kini ug ikatabang kanila.
Samtang si Victor Gabuya, usa sa mga trabahante sa Arena, nitug-an nga makaginhawa-ginhawa na sila kung moabli na ang mga sabongan, kay dul-an sa duha usab sila ka tuig naglisod sa pagbuhi sa ilang pamilya.
Dugang pa ni Gabuya nga kun buksan na pagbalik ang face to face nga sabong mawagtang na unta ang online sabong tungod kay makapaminos man unya kini sa ilang kita. —
